Oliy ta’lim, fan va innovatsiyalar vaziri Qo‘ng‘irotboy Sharipov joriy yilning 8-9-sentyabr kunlari Qatarning Doha shahriga ishchi tashrifi doirasida amaliy uchrashuvlar o‘tkazmoqda.
2024-09-09 12:00:00 / Vazirlik yangiliklari
Tashrifning birinchi kuni vazir boshchiligidagi delegatsiya Xamad bin Xalifa universiteti (HBKU) prezidenti doktor Axmad M. Hasnah bilan uchrashib, ikki mamlakat o‘rtasidagi ta’lim va ilm-fan sohasidagi hamkorlikni muhokama qildi. Tomonlar qator tashabbuslarni ilgari surib, ikki tomonlama aloqalarni yanada rivojlantirishga tayyor ekanliklarini bildirdi.
Uchrashuv davomida asosiy e’tibor turizm, sun’iy intellekt va neft-gaz sohalarida hamkorlikni rivojlantirishga qaratildi. Tomonlar sun’iy intellektni rivojlantirish bo‘yicha qo‘shma ilmiy loyihalarni tashkil etish, xalqaro konferensiyalar va tadbirlarda ishtirok etish imkoniyatlarini muhokama qildi. Neft-gaz sanoatida ikki davlat ilmiy markazlari va universitetlari o‘rtasida hamkorlik o‘rnatish rejalashtirildi.
Hamkorlik doirasida sun’iy intellekt yo‘nalishi bo‘yicha Toshkent axborot texnologiyalari universiteti Xamad bin Xalifa universiteti bilan hamkorlik o‘rnatib, neft-gaz sohasida Buxoro muhandislik-texnologiya instituti qo‘shma loyihalarda ishtirok etishi kutilmoqda.