Germaniyalik olimlar bilan ishlab chiqarishni raqamlashtirish va texnologiyalar transferini rivojlantirish boʻyicha hamkorlik muhokama qilindi
2026-08-19 17:20:00 / Vazirlik yangiliklari
Uchrashuvda Oʻzbekiston va Germaniya oʻrtasida oliy taʼlim, ilm-fan, innovatsiyalar va sanoat sohalaridagi hamkorlikni yanada rivojlantirish, ilmiy-tadqiqot natijalarini amaliyotga joriy etish, texnologiyalar transferini kengaytirish hamda ishlab chiqarish jarayonlarini raqamli transformatsiya qilish masalalari muhokama qilindi.
Muloqotda Oʻzbekistonda oliy taʼlim sifatini oshirish, ilmiy-tadqiqot salohiyatini kuchaytirish, amaliy tadqiqotlarni rivojlantirish, innovatsion ekotizimni shakllantirish, universitet va sanoat oʻrtasidagi hamkorlikni mustahkamlash, texnologiyalar transferi mexanizmlarini takomillashtirish hamda “Sanoat 4.0” va aqlli ishlab chiqarish tizimlarini joriy etish ustuvor yoʻnalishlar sifatida qayd etildi.
Shu nuqtayi nazardan, Fraunhofer IPKning amaliy tadqiqotlar, texnologiyalar transferi hamda davlat, akademik doiralar, ilmiy-tadqiqot muassasalari va sanoat oʻrtasidagi hamkorlik boʻyicha tajribasi Oʻzbekiston uchun muhim ahamiyat kasb etishi taʼkidlandi.
Uchrashuv davomida hamkorlikning bir qator aniq yoʻnalishlari boʻyicha takliflar bildirildi. Xususan, Fraunhofer xalqaro mobillik dasturi va Fraunhofer Attract grant dasturlari asosida “Fraunhofer–Oʻzbekiston yosh tadqiqotchilar mobillik dasturi”ni yoʻlga qoʻyish taklif etildi. Dastur doirasida oʻzbekistonlik yosh olimlarni 3–6 oy muddatga Fraunhofer laboratoriyalariga yuborish va ularning keyinchalik mahalliy korxonalarda amalga oshiriladigan tijoratlashtirish loyihalariga jalb etilishi koʻzda tutilmoqda.
Shuningdek, Toshkent davlat texnika universiteti qoshida “Suv va yashil energetika texnologiyalari” yoʻnalishida Fraunhofer Innovation Platform tashkil etish, Toshkent arxitektura-qurilish universitetida robototexnika va sunʼiy intellekt boʻyicha raqamli laboratoriya ochish tashabbuslari ilgari surildi.
Bundan tashqari, sanoat va oqova suvlardan resurslarni qayta ajratib olish boʻyicha qoʻshma pilot loyihani Germaniya Taʼlim va tadqiqotlar federal vazirligining Markaziy Osiyo uchun grant dasturiga birgalikda taqdim etish, ilmiy ishlanmalarni xalqaro platformalar orqali sanoatga integratsiya qilish va ularni tijoratlashtirish boʻyicha Fraunhofer tajribasidan foydalanish masalalari ham muhokama qilindi.
Uchrashuvda ishtirok etgan Oʻzbekiston oliy taʼlim tashkilotlari va ilmiy-tadqiqot institutlari vakillari ham hamkorlikning istiqbolli yoʻnalishlari boʻyicha oʻz takliflarini bildirdi.