O‘zbekiston Respublikasi Oliy taʼlim, fan va innovatsiyalar vazirligi

Mazkur vazifalar doirasida universitet olimlari va soha mutaxassislari tomonidan Yunusobod tumanidagi elektr tarmoqlari, jumladan, energiya isrofi yuqori boʻlgan transformatorlarning texnik holati oʻrganilmoqda. Obyektlarda oʻtkazilgan vizual va instrumental tekshiruvlar davomida ayrim kontakt birikmalarining lokal qizishi, tok oʻtkazuvchi shinalarning eskirishi va deformatsiyasi, kabel ulanishlaridagi kamchiliklar hamda kommutatsiya apparatlarining mavjud yuklamaga mos tanlanmagan holatlari aniqlandi.

Hozirda aniqlangan kamchiliklarni bartaraf etish boʻyicha amaliy chora-tadbirlar boshlab yuborilgan. Jumladan, eskirgan shinalarni almashtirish, kontakt birikmalarini taʼmirlash, kommutatsiya apparatlarini yangilash, kabel ulanishlarini me’yor talablariga muvofiqlashtirish hamda transformatorlarning texnik holatini tiklash ishlari olib borilmoqda.

Eʼtiborlisi, mazkur jarayonga universitetning dual taʼlim asosida tahsil olayotgan talabalari ham keng jalb etilmoqda. Xususan, talabalar uchun navbatdagi amaliy tashrif Yunusobod tuman elektr taʼminoti korxonasi ekspluatatsion brigadasi bilan hamkorlikda “Oloy bozori” majmuasidagi transformator punktida tashkil etildi.

Tashrif va oʻrganishlar davomida boʻlajak muhandislar energetik obyektning texnik holatini diagnostika qilish, texnologik sxemalar, elektr jihozlarining ishlash tamoyili va xavfsizlik talablari bilan yaqindan tanishdilar. Ular nuqsonlarni bartaraf etish jarayonlarida bevosita qatnashib, muhim amaliy koʻnikmalarga ega boʻlmoqda.

Bu kabi tizimli va amaliy mashgʻulotlar talabalarning universitetda olgan nazariy bilimlarini real ishlab chiqarish muhitida mustahkamlash hamda ularda zamonaviy muhandislik yondashuvini shakllantirishga xizmat qiladi. Olib borilayotgan bu ishlar nafaqat poytaxt elektr tarmoqlarining texnik holatini yaxshilash va elektr taʼminoti ishonchliligini oshirishga, balki energetika sohasi uchun haqiqiy mutaxassis kadrlar tayyorlashga ulkan hissa qoʻshadi.