O‘zbekiston Respublikasi Oliy taʼlim, fan va innovatsiyalar vazirligi

Yigʻilishda davlat rahbarining energetika sohasi uchun raqobatbardosh kadrlar tayyorlash boʻyicha belgilagan vazifalari ijrosi, 2026/2027 oʻquv yiliga tayyorgarlik, investitsiya loyihalarini amalga oshirish hamda Oʻzbekiston Respublikasi davlat mustaqilligining 35 yilligini munosib nishonlash masalalari muhokama qilinib, ustuvor vazifalar belgilandi.
 
Yigʻilishda Oʻzbekiston Respublikasi Bosh prokurori oʻrinbosari Salom Samadov, Energetika vazirining birinchi oʻrinbosari Umid Mamadaminov, shuningdek, tegishli vazirlik va idoralar hamda yirik tarmoq korxonalari rahbarlari ishtirok etdi.
 
Taʼkidlanganidek, bugungi kunda 39 ta oliy taʼlim tashkilotida energetika yoʻnalishlari boʻyicha 17 780 nafar talaba tahsil olmoqda. Prezident topshiriqlariga muvofiq taʼlim jarayonini ishlab chiqarish bilan yanada integratsiya qilish, zamonaviy laboratoriyalar va oʻquv poligonlarini tashkil etish, talabalarning soha korxonalaridagi amaliy tayyorgarligini kuchaytirish boʻyicha vazifalar belgilandi.
 
Shuningdek, 2026/2027 oʻquv yilidan boshlab energetika yoʻnalishida tahsil olayotgan 3-bosqich talabalarining kamida yarmi, 4-bosqich talabalarining esa barchasini dual taʼlimga jalb etish choralari belgilandi.
 
Yigʻilishda yangi oʻquv yilida bakalavriat va magistratura bosqichlariga 250 mingdan ortiq abituriyent qabul qilinishi, mehnat bozori ehtiyojlaridan kelib chiqqan holda 31 ta yangi bakalavriat taʼlim yoʻnalishi va 23 ta magistratura mutaxassisligi ochilishi qayd etildi.
Shu munosabat bilan taʼlim dasturlari, professor-oʻqituvchilar tarkibi, auditoriyalar, laboratoriyalar, LMS platformalari va oʻquv resurslarini yangi oʻquv yili boshlangunga qadar toʻliq tayyor holatga keltirish boʻyicha topshiriqlar berildi.
 
Yigʻilishda 2026-yilgi Investitsiya dasturi doirasida 22 ta loyiha boʻyicha 120 mln AQSH dollari miqdorida xorijiy investitsiya oʻzlashtirilishi rejalashtirilgani qayd etildi.
 
Yilning birinchi yarim yilligida 43,6 mln dollar xorijiy investitsiya jalb qilinib, rejaga nisbatan 122 foizlik oʻsish taʼminlangani maʼlum qilindi.

Yigʻilishda kelgusi yil uchun rejalashtirilgan investitsiya loyihalari hajmini kamida 20 foizga oshirish vazifasi qoʻyildi. Shuningdek, investitsiya va grant loyihalarini samarali amalga oshirish, yangi tashabbuslarni shakllantirish hamda har bir oliy taʼlim muassasasining investitsiya portfelini kengaytirish boʻyicha topshiriqlar berildi.
 
Yigʻilishda Oʻzbekiston Respublikasi davlat mustaqilligining 35 yilligini “Yagona Vatan, yagona xalq boʻlib, yangi hayot va kelajak yaratamiz!” bosh gʻoyasi asosida yuqori saviyada oʻtkazish, “Mustaqillik darslari” va maʼnaviy-maʼrifiy tadbirlarni tashkil etish, yoshlarni “35 000 tashabbus” umummilliy dasturida faol ishtirok etishga jalb qilish yuzasidan ham tegishli vazifalar belgilandi.
 
Yigʻilish yakunida belgilangan topshiriqlarning oʻz vaqtida va sifatli ijrosini taʼminlash oliy taʼlim tashkilotlari rahbarlarining shaxsiy masʼuliyati ekani alohida taʼkidlandi.