Vazir “Yangi Oʻzbekiston” universiteti faoliyati va yangi kampus qurilishi bilan tanishdi
2026-08-01 16:00:00 / Vazirlik yangiliklari
Tashrif avvalida vazir universitetning zamonaviy oʻquv va ilmiy infratuzilmasini koʻzdan kechirdi. Xususan, Mechanics Lab faoliyati bilan tanishilib, unda muhandislik yoʻnalishida tahsil olayotgan talabalar nazariy bilimlarini amaliy tajribalar bilan mustahkamlashlari uchun yaratilgan sharoitlar, zamonaviy laboratoriya uskunalari, mexanik tizimlarni loyihalash, sinovdan oʻtkazish va tahlil qilish imkoniyatlari namoyish etildi. Laboratoriyada talabalarning amaliy koʻnikmalarini rivojlantirish, ilmiy izlanishlar olib borish hamda innovatsion muhandislik yechimlarini ishlab chiqishga alohida eʼtibor qaratilgani taʼkidlandi.
Shuningdek, vazir Yangi Toshkent shahrida bunyod etilayotgan “Yangi Oʻzbekiston” universitetining yangi kampusi qurilish maydonida boʻlib, amalga oshirilayotgan bunyodkorlik ishlari va loyiha yechimlari bilan tanishdi.
Hozirda 50 gektar maydonda barpo etilayotgan yangi kampus 16 ta zamonaviy binoni oʻz ichiga oladi va qurilish ishlari uch bosqichda amalga oshirilmoqda. Kampus tarkibida muhandislik, menejment, tabiiy fanlar, tibbiyot, raqamli texnologiyalar va agrotexnologiyalar maktablari, ilgʻor texnik tadqiqotlar instituti, innovatsion texnopark, sanoat va texnologiyalar xabi, maʼmuriy bino, tibbiyot markazi, talabalar turar joylari, sport majmuasi, suzish havzasi hamda boshqa ijtimoiy infratuzilma obyektlari barpo etilmoqda.
Tashrif davomida yangi kampus qurilishini belgilangan muddatlarda va yuqori sifatda yakunlash, taʼlim, ilm-fan va innovatsiyalarni yagona ekotizimda uygʻunlashtiradigan xalqaro standartlarga mos zamonaviy universitet muhitini shakllantirish masalalari muhokama qilindi. Vazir tomonidan qurilish jarayonini jadallashtirish, obyektlarni sifatli foydalanishga topshirish hamda kelgusida kampusni ilmiy tadqiqotlar va innovatsion ishlanmalar markaziga aylantirish yuzasidan tegishli topshiriqlar berildi.