O‘zbekiston Respublikasi Oliy taʼlim, fan va innovatsiyalar vazirligi

Yigʻilishda Oʻzbek-Fransuz universiteti, Bauman nomidagi Moskva davlat texnika universitetining Toshkent shahridagi filiali, shuningdek, Xitoy, Yaponiya va Germaniyaning nufuzli oliy taʼlim muassasalari bilan hamkorlikda amalga oshirilayotgan istiqbolli loyihalar boʻyicha amalga oshirilayotgan ishlar muhokama qilindi. Mazkur loyihalarni oʻz vaqtida va sifatli amalga oshirish, qurilish hamda rekonstruksiya ishlarini jadallashtirish, moliyalashtirish, tashkiliy-huquqiy hujjatlarni rasmiylashtirish, kadrlar bilan taʼminlash va qabul jarayonlarini samarali tashkil etish masalalari koʻrib chiqildi. Xususan, Bauman nomidagi Moskva davlat texnika universitetining Toshkent shahridagi filiali boʻyicha qurilish ishlarini jadallashtirish, filial faoliyatini toʻliq yoʻlga qoʻyish hamda abituriyentlarni jalb qilish va qabul jarayonini keng targʻib etish yuzasidan tegishli topshiriqlar berildi. Shuningdek, Oʻzbek-Fransuz universiteti faoliyati atroflicha koʻrib chiqilib, universitetni malakali kadrlar bilan taʼminlash, magistraturaga qabul jarayonini takomillashtirish hamda infratuzilmani yanada rivojlantirish boʻyicha vazifalar belgilab olindi. Yigʻilish davomida Xitoy, Yaponiya va Germaniyaning nufuzli oliy taʼlim muassasalari bilan hamkorlikda amalga oshirilayotgan yangi taʼlim loyihalari boʻyicha tashkiliy ishlar, huquqiy hujjatlarni tayyorlash va amaliy chora-tadbirlarni jadallashtirish masalalari ham muhokama qilindi. Yigʻilish yakunida vazir har bir loyiha ijrosini tizimli nazorat qilish, belgilangan vazifalarni oʻz vaqtida va sifatli bajarish hamda xalqaro hamkorlik doirasida amalga oshirilayotgan taʼlim loyihalarini samarali yoʻlga qoʻyish yuzasidan masʼul rahbarlarga aniq topshiriqlar berdi.