Ularda professional ta’lim muassasalarining 100 nafarga yaqin rahbar xodimlari ta’limda sifatni ta’minlash, baholash metodologiyasi, ish beruvchilar bilan hamkorlikni rivojlantirish, ishlab chiqarish amaliyotlarini samarali tashkil etish kabi mavzularda o‘zaro tajribalar almashishdi. Jumladan:

♦ Yevropa Ittifoqi tomonidan moliyalashtirilayotgan YUNESKOning “O‘zbekistonning qishloq joylarida ishga joylashtirish ko‘nikmalarini rivojlantirish” loyihasi doirasida xalqaro ekspertlar ishtirokida joriy yilning 21–22-avgust kunlari “Professional ta’limda sifatni ta’minlash hamda o‘zaro baholash” mavzusida seminar o‘tkazildi.

Seminarda 60 dan ortiq professional ta’lim muassasasi direktor va o‘rinbosarlari ishtirok etdi. Asosiy maqsad professional ta’lim muassasalariga sifatni ta’minlash milliy ramkasi doirasida asosiy vazifalar hamda o‘zaro baholash metodologiyasi yuzasidan tajriba almashishdan iborat.

Seminar yakunida ishtirokchilar professional ta’limda sifatni ta’minlash mezonlaridan foydalanish, o‘zaro baholash, sifatni yaxshilash bo‘yicha kerakli bilim va ko‘nikmalarga ega bo‘ldilar.

♦ Shveysariya hukumati tomonidan moliyalashtirilayotgan “Helvetas Uzbekistan”ning “O‘zbekistonda professional ta’lim islohotlarini qo‘llab-quvvatlash” (VET4UZ) loyihasi doirasida xalqaro ekspertlar ishtirokida joriy yilning 21–22-avgust kunlari “Professional ta’limda kattalarni o‘qitish” mavzusida pedagog kadrlari uchun o‘quv seminar o‘tkazildi.

Seminarda dual ta’limda kadrlar tayyorlashda ish beruvchilar bilan hamkorlikni rivojlantirish, kattalarni o‘qitish, ishlab chiqarish amaliyotlarini tashkil etishda o‘qituvchining roli, ta’lim sifatini ta’minlash va boshqarish yuzasidan 15 nafar tizim xodimlari o‘qitildi.

Loyiha doirasida tajriba-sinov tariqasida joriy etiladigan dual ta’limda kadrlar tayyorlash bo‘yicha ishlab chiqilgan ta’lim dasturi taqdimoti o‘tkazildi.

♦ Germaniya xalqaro hamkorlik jamiyati (GIZ)ning “O‘zbekistonda professional ta’lim tizimini isloh qilish va modernizatsiya jarayonini qo‘llab-quvvatlash” loyihasi doirasida joriy yilning 21-avgust kuni “Professional ta’lim sohasida ish beruvchilar bilan hamkorlik qilish” mavzusida seminar trening o‘tkazildi.

Seminar-treningda xalqaro ekspertlar, vazirlik va ish beruvchilar vakillari hamda professional ta’lim muassasalari rahbarlari ishtirok etdi.

Seminar davomida yengil sanoat yo‘nalishdagi ta’lim dasturlarini takomillashtirish, ta’lim muassasasi va korxona o‘rtasida hamkorlikni kuchaytirish, ishlab chiqarish amaliyotlarini tashkil etish, dual ta’limning huquqiy asoslari, ishlab chiqarish ta’limi ustalari malakasini oshirish kabi masalalar muhokama qilindi.

Shuningdek, loyiha doirasida tayyorlangan Kasbiy standartlar asosida ta’lim dasturini ishlab chiqish bo‘yicha metodik qo‘llanma taqdimoti o‘tkazildi.