“Future 100” dasturi: Silikon vodiysida sun’iy intellekt va innovatsion ta’lim tajribasi o‘rganilmoqda
2026-07-15 18:00:00 / Vazirlik yangiliklari
Dastur doirasida o‘tkazilgan treningda xalqaro ekspert Bayram Annakov sun’iy intellekt texnologiyalarining zamonaviy ta’lim tizimidagi o‘rni, ularni o‘quv jarayonlariga samarali integratsiya qilish mexanizmlari hamda dunyoning ilg‘or universitetlarida qo‘llanilayotgan amaliy tajribalar haqida ma’ruza qildi. Shuningdek, ishtirokchilar bilan sun’iy intellektdan ta’lim sifatini oshirish, o‘quv jarayonlarini shaxsiylashtirish va akademik boshqaruvni takomillashtirish yo‘nalishlari yuzasidan fikr almashildi.
Shundan so‘ng, dastur ishtirokchilari AQSHning nufuzli oliy ta’lim tashkilotlaridan biri — San-Fransisko davlat universitetiga tashrif buyurib, universitetning ta’lim va ilmiy-tadqiqot faoliyati, innovatsion infratuzilmasi, xalqaro hamkorlik yo‘nalishlari hamda talabalar uchun yaratilgan zamonaviy imkoniyatlar bilan yaqindan tanishdilar.
Ma’lumot uchun, San-Fransisko davlat universiteti zamonaviy texnologiyalar, biznes, muhandislik va axborot texnologiyalari yo‘nalishlarida yuqori malakali mutaxassislar tayyorlaydigan, Silikon vodiysi innovatsion ekotizimi bilan faol hamkorlik qiluvchi oliy ta’lim muassasalaridan biri hisoblanadi.
Universitet ta’lim jarayonini sanoat korxonalari, texnologik kompaniyalar va startaplar bilan integratsiyalashgan holda tashkil etishi bilan ajralib turadi.