“Future 100” dasturi: bir guruh vazirlik xodimlari va yosh muhandis olimlar AQSHda stajirovka oʻtamoqda
2026-07-14 09:00:00 / Vazirlik yangiliklari
📝 Dasturning birinchi kuni ishtirokchilar uchun tanishuv va yoʻnaltiruv sessiyasi oʻtkazilib, Silkroad Innovation Hub rahbariyati tomonidan stajirovka dasturining maqsadlari, oʻquv modullari, amaliy uchrashuvlar hamda ishtirokchilardan kutilayotgan natijalar taqdim etildi.
💡 Shuningdek, Silikon vodiysining startap va innovatsiyalar ekotizimiga bagʻishlangan amaliy seminarda universitetlar, texnologik kompaniyalar, venchur fondlari, akseleratorlar va startaplar oʻrtasidagi hamkorlik mexanizmlari tahlil qilindi.
✔️Seminar davomida Oʻzbekiston oliy taʼlim va innovatsiyalar tizimiga universitetlarda startaplarni qoʻllab-quvvatlash mexanizmlarini kuchaytirish, ilmiy ishlanmalarni tijoratlashtirishga xususiy sektor va venchur sarmoyalarni keng jalb etish, universitet–startap–investor–sanoat hamkorligini mustahkamlash, istiqbolli loyihalarni xalqaro akseleratsiya dasturlariga olib chiqish boʻyicha Silikon vodiysi tajribasini joriy etish masalalari muhokama qilindi.
🔸Maʼlumot uchun, Silkroad Innovation Hub — Silikon vodiysida Markaziy Yevroosiyo davlatlarining texnologik startaplari, tadbirkorlari va innovatsion loyihalarini qoʻllab-quvvatlash, ularning AQSH innovatsiyalar ekotizimi, xalqaro akseleratorlar, investorlar va texnologik kompaniyalar bilan hamkorligini kengaytirishga koʻmaklashuvchi innovatsion platforma hisoblanadi.
🎓 Dastur doirasida ishtirokchilar dunyoning yetakchi oliy taʼlim muassasalaridan biri — Stenford universitetiga tashrif buyurib, uning ilmiy-tadqiqot infratuzilmasi, innovatsion tadbirkorlik muhiti hamda universitet, sanoat va xususiy kapital oʻrtasidagi samarali hamkorlik modellari bilan tanishdi.
👨🏫 Shuningdek, Stenford universiteti professori Georgiy Blank ishtirokida “Digital Innovation” mavzusida vorkshop tashkil etildi. Mashgʻulotda innovatsion tadbirkorlik, startap-inkubatsiya, texnologiyalar transferi va ilmiy ishlanmalarni tijoratlashtirishning zamonaviy mexanizmlari yuzasidan amaliy tavsiyalar berildi.
🌍 “Future 100” stajirovka dasturi ishtirokchilari uchun bu kabi uchrashuvlar xalqaro innovatsiyalar ekotizimining ilgʻor tajribasini oʻrganish, yangi hamkorlik aloqalarini yoʻlga qoʻyish hamda Oʻzbekistonda innovatsion rivojlanishga xizmat qiladigan tashabbuslarni shakllantirishda muhim ahamiyat kasb etadi.