“Yangi O‘zbekiston” universitetida “Rektorlar maktabi” dasturiga qabul tartibi tasdiqlandi
2026-07-13 19:25:00 / Vazirlik yangiliklari
📝 Nizomga ko‘ra:
➖ dasturga 30 yoshga to‘lgan, kamida magistr darajasiga ega bo‘lgan hamda oliy ta’lim sohasida kamida 5 yillik ish tajribasi, shundan kamida 2 yil rahbarlik lavozimida ishlagan nomzodlar ochiq tanlov asosida qabul qilinadi;
➖ rahbarlik tajribasi sifatida rektor, prorektor, direktor, direktor o‘rinbosari, dekan, dekan o‘rinbosari, kafedra mudiri, boshqarma va bo‘lim boshliqlari hamda boshqaruv funksiyalari yuklatilgan boshqa rahbarlik lavozimlaridagi faoliyat inobatga olinadi;
➖ qabul mutlaqo bepul hamda ochiq tanlov asosida amalga oshiriladi;
➖ qabul bir yilda kamida ikki marotaba o‘tkaziladi, yillik qabul kvotasi 80 nafar etib belgilangan.
Dasturga qabul 4 bosqichda amalga oshiriladi:
1️⃣ hujjatlarni qabul qilish va o‘rganish;
2️⃣ test sinovlari – o‘quv-akademik boshqaruv, moliya-iqtisodiyot, ilmiy tadqiqotlar va innovatsiyalar, ma’naviyat va ma’rifat, sun’iy intellekt va axborot texnologiyalari hamda ingliz tili bo‘yicha (maksimal 100 ball, 55 balldan yuqori natija keyingi bosqichga yo‘llanadi).
Bunda baholash mezonlari quyidagicha belgilanadi:
🔹 40 ta mutaxassislik testi – 80 ball;
🔹 20 ta ingliz tili testi – 20 ball.
B2 yoki undan yuqori darajadagi amal qiluvchi milliy yoki xalqaro sertifikatga ega nomzodlarga ingliz tili bo‘yicha maksimal 20 ball beriladi;
3️⃣ psixologik baholash – nomzodlarning psixoemotsional barqarorligi, boshqaruv salohiyati, rivojlanishga tayyorligi va stressga chidamliligi aniqlanadi (maksimal 100 ball, 55 balldan yuqori natija suhbat bosqichiga o‘tkaziladi).
Psixologik o‘rganishda har bir toʻgʻri javob uchun 0,5 ball beriladigan 200 ta topshiriq uchun 100 ball belgilanadi;
4️⃣ suhbat – strategik va tizimli fikrlash, kommunikativ ko‘nikmalar, liderlik salohiyati, qaror qabul qilishda halollik, kasbiy bilimlar hamda o‘qishga tayyorlik va motivatsiya baholanadi (maksimal 100 ball, 60 balldan yuqori natija yakuniy reytingda ishtirok etadi).
Yakuniy natijalar elektron platformada e’lon qilinadi. Natijalardan norozi bo‘lgan nomzodlar 5 ish kuni ichida apellyatsiya berish huquqiga ega.