Vazir Qoraqalpog‘istondagi oliygohlar rahbarlari bilan uchrashdi
2024-08-20 10:00:00 / Vazirlik yangiliklari
19-avgust kuni Oliy ta’lim, fan va innovatsiyalar vaziri Qo‘ng‘irotboy Sharipov Qoraqalpog‘iston Respublikasiga xizmat safari davomida Berdaq nomidagi Qoraqalpoq davlat universitetida bo‘lib, bu yerda hududdagi oliy ta’lim muassasalari rahbarlari bilan yig‘ilish o‘tkazdi.
Dastlab vazir Q.Sharipov so‘zga chiqib, yurtimizda so‘nggi yillarda ta’lim sohasiga ko‘rsatilayotgan eʼtibor natijasida sohaning moddiy-texnik bazasi mustahkamlanishi, shuningdek, o‘qituvchilar va ustozlarga munosib mehnat sharoitlarini yaratishga alohida eʼtibor qaratilayotganini taʼkidladi.
Shundan so‘ng, oliy ta’lim muassasalari rahbarlarining yangi o‘quv yilini yuqori darajada boshlash, o‘quv jarayonini to‘g‘ri tashkil etish, talabalarni turar joy bilan taʼminlash borasidagi axborotlari tinglandi. Vazir yangi o‘quv yiliga tayyorgarlik ko‘rishda, ta’lim sifatini taʼminlashda yo‘l qo‘yilayotgan kamchiliklarga ham to‘xtalib, amalga oshirilishi zarur bo‘lgan vazifalar bo‘yicha qator topshiriqlar berdi.
