O‘zbekiston Respublikasi Oliy taʼlim, fan va innovatsiyalar vazirligi

Muloqot chog‘ida O‘zbekiston va Misr o‘rtasidagi ko‘p asrlik tarixiy aloqalarni zamonaviy oliy ta’lim, ilm-fan va innovatsiyalar yo‘nalishida yangi bosqichga olib chiqish masalalari muhokama qilindi. Tomonlar ikki mamlakatning ustuvor yo‘nalishlari — suv resurslari boshqaruvi, yangi va qayta tiklanuvchi energiya manbalari, qishloq xo‘jaligi hamda sun’iy intellekt sohalarida qo‘shma ilmiy-tadqiqot loyihalarini amalga oshirish muhimligini ta’kidladilar.

Uchrashuv davomida olimlar, tadqiqotchilar va professor-o‘qituvchilarning o‘zaro tashriflarini faollashtirish, qo‘shma malaka oshirish dasturlari, stajirovkalar, seminar va ilmiy konferensiyalar tashkil etish, shuningdek, ikki mamlakat oliy ta’lim tashkilotlari o‘rtasida to‘g‘ridan-to‘g‘ri sheriklik aloqalarini rivojlantirish yuzasidan fikr almashildi.

Tomonlar qo‘shma ta’lim dasturlarini yo‘lga qo‘yish, magistratura va doktorantura yo‘nalishlarida hamkorlikni kengaytirish, ilmiy kadrlar tayyorlash hamda talabalar almashinuvini rivojlantirish masalalariga alohida e’tibor qaratdilar. Shu bilan birga, o‘zaro stipendiya dasturlarini yo‘lga qo‘yish va akademik mobillikni kengaytirish istiqbollari muhokama qilindi.

Uchrashuvda joriy yilning 28–30-iyul kunlari Qohira shahrida “Study in Uzbekistan” ta’lim ko‘rgazmasi tashkil etilishi, unda O‘zbekistonning 15 ta oliy ta’lim tashkiloti ishtirok etishi hamda ayni paytda Misrdan 390 nafar talaba O‘zbekiston oliy ta’lim tashkilotlarida, asosan tibbiyot yo‘nalishida tahsil olayotgani qayd etildi.

Shuningdek, Misr Arab Respublikasi Oliy ta’lim va ilmiy tadqiqotlar vazirligi hamda O‘zbekiston Respublikasi Oliy ta’lim, fan va innovatsiyalar vazirligi o‘rtasida 2026–2030-yillarga mo‘ljallangan oliy ta’lim, fan va innovatsiyalar sohasidagi hamkorlik bo‘yicha Ijro dasturi loyihasi muhokama qilindi. Hujjat loyihasi Misr tomoniga ko‘rib chiqish uchun yuborilgani hamda uni yakuniy kelishish maqsadida mutaxassislar ishtirokida onlayn uchrashuv o‘tkazish taklif etildi.

Bundan tashqari, O‘zbekiston Geologiya fanlari universiteti tomonidan Misrning “Seagull Petroleum and Mining” kompaniyasi bilan Qohira shahrida universitet filialini tashkil etish bo‘yicha olib borilayotgan muzokaralar yuzasidan ham fikr almashildi. Dastlabki kelishuvga erishilgani va tegishli shartnomani imzolash bo‘yicha Misr tomoni Toshkentga taklif etilgani ma’lum qilindi.

Uchrashuv yakunida tomonlar ilmiy-innovatsion faoliyat, texnologiyalar transferi, texnologik tadbirkorlik va ilmiy ishlanmalarni tijoratlashtirish sohalarida hamkorlikni yanada rivojlantirish, shuningdek, Toshkent va Qohira o‘rtasida qo‘shma innovatsion platforma yaratish istiqbollarini qo‘llab-quvvatlashga tayyor ekanliklarini bildirib, O‘zbekiston va Misr o‘rtasidagi ta’lim va ilm-fan sohasidagi hamkorlikni yangi bosqichga olib chiqish borasida o‘zaro qat’iy intilishlarini tasdiqladilar.