“Narkotahdidlar: muammolar, yangi chaqiriqlar va innovatsion yondashuvlar” mavzusidagi xalqaro anjuman bo‘lib o‘tdi
2026-06-26 16:55:00 / Vazirlik yangiliklari

Unda Giyohvandlik vositalari va psixotrop moddalar ustidan nazorat qilish bo‘yicha Davlat va hududiy komissiyalar a’zolari, mutasaddi davlat organlari va jamoat tashkilotlari rahbarlari, mahalliy organlar vakillari, mutaxassis va ekspertlar, xalqaro tashkilotlar hamda diplomatik korpus vakillari, shuningdek, ommaviy axborot vositalari xodimlari ishtirok etdi.
Tadbir doirasida huquqni muhofaza qiluvchi organlar tomonidan noqonuniy muomaladan olingan jami 2 tonna 963 kilogramm 610 gramm giyohvandlik vositalari, psixotrop va kuchli ta’sir qiluvchi moddalar hamda prekursorlar yoqish yo‘li bilan yo‘q qilindi. Jarayon tadbir ishtirokchilari va OAV vakillari tomonidan onlayn tarzda kuzatildi.
Seminar yakunida giyohvandlikka qarshi kurashish, narkojinoyatchilikning oldini olish hamda sog‘lom turmush tarzini targ‘ib etish yo‘nalishida samarali faoliyat olib borayotgan bir guruh mutaxassislar taqdirlandi.
Xususan, Oliy ta’lim, fan va innovatsiyalar vazirligi bosh mutaxassisi Alisher Mansurovich Islomov “Giyohvandlikka qarshi kurashish fidoiysi” ko‘krak nishoni bilan taqdirlandi.
Mazkur yuksak e’tirof uning mamlakatimizda giyohvandlik va narkojinoyatchilikka qarshi kurashish, aholi xavfsizligini ta’minlash hamda jamiyatda sog‘lom turmush tarzini qaror toptirish borasidagi fidokorona mehnatlarining munosib e’tirofidir.
Oliy ta’lim, fan va innovatsiyalar vazirligi jamoasi nomidan Alisher Islomovni ushbu mukofot bilan samimiy tabriklaymiz hamda kelgusi faoliyatida ulkan muvaffaqiyatlar tilaymiz.









