O‘zbekiston Respublikasi Oliy taʼlim, fan va innovatsiyalar vazirligi

Tadbirda ommaviy axborot vositalari vakillari, hamkor davlat tashkilotlari, soha mutaxassislari hamda keng jamoatchilik ishtirok etdi.

Matbuot anjumani davomida mamlakatimizda giyohvandlik va narkojinoyatchilikka qarshi kurashish borasida amalga oshirilayotgan ishlar, aholi, ayniqsa yoshlar o‘rtasida profilaktika tadbirlarini kuchaytirish, sog‘lom turmush tarzini targ‘ib qilish hamda narkotik vositalarning noqonuniy muomalasiga qarshi kurashish sohasida erishilgan natijalar haqida atroflicha ma’lumot berildi.

Ta’kidlanganidek, giyohvandlikka qarshi kurashish nafaqat huquqni muhofaza qiluvchi organlar, balki ta’lim muassasalari, mahalla, oila va keng jamoatchilikning hamkorligini talab etadigan muhim vazifalardan biridir.

Oliy ta’lim, fan va innovatsiyalar vazirligi tomonidan ham talaba-yoshlarni giyohvandlik va narkojinoyatchilikning salbiy ta’siridan asrash, ular o‘rtasida sog‘lom turmush tarzini qaror toptirish hamda huquqbuzarliklarning oldini olishga qaratilgan keng ko‘lamli ishlar amalga oshirilmoqda.

Xususan, “Yoshlar o‘rtasida narkotiklarning tarqalishiga qarshi kurashish” keng qamrovli tezkor-profilaktik oyligi doirasida 2026-yil 12-iyun holatiga ko‘ra oliy ta’lim muassasalarida Narkotiklar va o‘qotar qurollarni nazorat qilish agentligi, huquq-tartibot organlari, sog‘liqni saqlash muassasalari va narkolog mutaxassislar ishtirokida 1 417 ta profilaktik tadbir hamda 578 ta davra suhbati va uchrashuvlar tashkil etildi. Mazkur tadbirlarda giyohvandlikning salbiy oqibatlarini yorituvchi ta’sirchan videoroliklar namoyish qilinib, jami 265 098 nafar talaba-yoshlar qamrab olindi.

Oylik doirasida o‘tkazilgan tadbirlar 1 345 marotaba respublika va hududiy telekanallar, gazeta-jurnallar, internet nashrlari hamda ijtimoiy tarmoqlarda keng yoritildi.

Shuningdek, O‘zbekiston Respublikasi Prezidenti Administratsiyasi huzuridagi Narkotiklar va o‘qotar qurollarni nazorat qilish agentligi hamda Ichki ishlar vazirligi bilan hamkorlikda 2026-yil 5–10-yanvar kunlari oliy ta’lim muassasalariga biriktirilgan profilaktika inspektorlari uchun malaka oshirish o‘quv yig‘inlari tashkil etildi. Ularda davlat organlari mutaxassislari tomonidan nazariy va amaliy mashg‘ulotlar olib borildi.

Bugungi kunda har oy profilaktika inspektorlari ishtirokida onlayn yig‘ilishlar o‘tkazilib, talabalar orasida sodir etilayotgan giyohvandlik bilan bog‘liq jinoyatlar tahlil qilinmoqda hamda ularning oldini olish bo‘yicha zarur tavsiyalar berib borilmoqda.

Mahallalarda uyushmagan yoshlar bilan “Giyohvandlik – umr zavoli” mavzusida 856 ta profilaktik tadbir tashkil etilib, ularda 117 809 nafar yoshlar ishtiroki ta’minlandi. Oliy ta’lim tashkilotlarida esa “Giyohvandlikka yo‘q deymiz!” shiori ostida 1 234 ta tarbiyaviy-profilaktik tadbir o‘tkazilib, 234 502 nafar talaba-yoshlar qamrab olindi.

Oliy ta’lim muassasalarining yoshlar yetakchilari boshchiligida faol talabalardan iborat “Yosh targ‘ibotchilar guruhlari” tashkil etilgan bo‘lib, ular tomonidan giyohvandlik va narkojinoyatlarning salbiy oqibatlariga bag‘ishlangan 705 ta maqsadli targ‘ibot tadbiri o‘tkazildi.

Yoshlar, ota-onalar va pedagoglarni giyohvandlik hamda narkojinoyatlarning salbiy oqibatlaridan ogohlikka chaqiruvchi qo‘shma murojaat ishlab chiqilib, barcha oliy ta’lim muassasalarida talabalar, professor-o‘qituvchilar va ota-onalar ishtirokida 2 477 ta muhokama tashkil etildi.

“Mahalla — oilaviy poliklinika — ta’lim muassasasi” tamoyili asosida pedagoglar, tibbiyot xodimlari, profilaktika inspektorlari va mahalla faollari hamkorligida 1 355 ta profilaktik tadbir o‘tkazilib, ularda 208 642 nafar talaba-yoshlar qatnashdi.

Ayni paytda respublikadagi 187 ta oliy ta’lim muassasasida “Qalqon” xavfsizlik patrullari faoliyat yuritmoqda. Ular tarkibida 6 070 nafar talaba hamda 1 405 nafar professor-o‘qituvchi, tyutor va mas’ul xodimlar faol ishtirok etmoqda. Mazkur patrullar yordamida 169 ta oliy ta’lim tashkilotida giyohvandlik va narkojinoyatlarning oldini olishga qaratilgan profilaktik choralar amalga oshirildi.

Bundan tashqari, “Giyohvandlik – umr zavoli” shiori ostida talabalar teatr studiyalari o‘rtasida sahna ko‘rinishlari tashkil etilib, ushbu tadbirlarga 102 578 nafar talabalar jalb qilindi.

Talaba-yoshlarning giyohvandlik va narkojinoyatlarning salbiy oqibatlarini chuqurroq anglashlari maqsadida Ichki ishlar vazirligi huzuridagi Jazoni ijro etish departamenti bilan hamkorlikda jazoni ijro etish muassasalariga tashriflar tashkil etilmoqda. 2026-yil 12-iyun holatiga ko‘ra 87 ta oliy ta’lim muassasasining 103 647 nafar talabasi 42 ta jazoni ijro etish muassasasiga tashrif buyurdi.

Shuningdek, “Ta’lim – oila – mahalla” tamoyili asosida “Giyohvandlikdan holi ta’lim muassasasi” konsepsiyasi tasdiqlanib, barcha oliy ta’lim tashkilotlariga ijro uchun yuborildi. Narkojinoyatga aloqador holatlar haqida anonim xabar berish imkoniyatini yaratish maqsadida oliy ta’lim muassasalarida 486 ta maxsus quti o‘rnatilib, ular orqali kelib tushayotgan murojaatlarni muntazam o‘rganish amaliyoti yo‘lga qo‘yilgan.

Tadbir davomida yoshlarni giyohvandlik va narkojinoyatlardan himoya qilish, ular o‘rtasida sog‘lom turmush tarzini keng targ‘ib etish, profilaktik tadbirlar samaradorligini yanada oshirish hamda davlat organlari, fuqarolik jamiyati institutlari va ommaviy axborot vositalari o‘rtasidagi hamkorlikni mustahkamlash masalalari muhokama qilindi.

Matbuot anjumani yakunida ommaviy axborot vositalari vakillarining savollariga batafsil javoblar berildi hamda giyohvandlikka qarshi kurashishda jamiyatning barcha qatlamlari hamkorligi muhim ahamiyat kasb etishi alohida ta’kidlandi.