O‘zbekiston Respublikasi Oliy taʼlim, fan va innovatsiyalar vazirligi

Yigʻilishda oliy taʼlimdan keyingi taʼlim, davlat dasturlari doirasida amalga oshirilayotgan ilmiy loyihalar, ilmiy ishlanmalarni tijoratlashtirish, startap loyihalari, spin-off korxonalar faoliyati, professor-oʻqituvchilarning ilmiy salohiyati hamda xalqaro ilmiy nashrlardagi faollik kabi dolzarb masalalar atroflicha tahlil qilindi.

Taʼkidlanganidek, mamlakatimizda ilm-fan va innovatsiyalar sohasini rivojlantirish, yangi avlod ilmiy kadrlarini tayyorlash hamda ularning salohiyatini oshirish davlat siyosatining ustuvor yoʻnalishlaridan biri hisoblanadi. Shu nuqtayi nazardan, oliy taʼlim tashkilotlari faoliyati samaradorligini baholashda ilmiy tadqiqotlar natijalari, ilmiy ishlanmalarning iqtisodiyot tarmoqlariga joriy etilishi va tijoratlashtirilishi muhim ahamiyat kasb etishi qayd etildi.

Yigʻilishda Namangan viloyatidagi oliy taʼlim tashkilotlarida oliy taʼlimdan keyingi taʼlimni tashkil etish, doktorantlar va mustaqil izlanuvchilar faoliyati, davlat ilmiy dasturlari doirasidagi loyihalar hamda startap tashabbuslarining holati yuzasidan amalga oshirilgan monitoring natijalari koʻrib chiqildi.

Shuningdek, ayrim oliy taʼlim tashkilotlarida dissertatsiya himoyalarining belgilangan muddatlarda amalga oshirilmayotgani, ilmiy loyihalar sonining yetarli emasligi, ilmiy ishlanmalarni tijoratlashtirish va spin-off korxonalar tashkil etish boʻyicha ishlar talab darajasida emasligi tanqidiy muhokama qilindi.

Yigʻilish yakunida oliy taʼlim tashkilotlari rahbarlariga ilmiy salohiyatni oshirish, doktorantlarning oʻz vaqtida dissertatsiya himoya qilish koʻrsatkichlarini yaxshilash, xalqaro reytingli jurnallarda maqolalar chop etish faolligini kuchaytirish, ilmiy ishlanmalarni tijoratlashtirish va iqtisodiyot tarmoqlari bilan hamkorlikni kengaytirish boʻyicha aniq vazifalar belgilab berildi.

Shu bilan birga, har bir oliy taʼlim tashkilotsida stajyor-tadqiqotchilar uchun individual rivojlanish xaritalari ishlab chiqish, xoʻjalik shartnomalari asosida jalb etilayotgan mablagʻlar hajmini oshirish hamda hududning sanoat, qishloq xoʻjaligi, toʻqimachilik, qurilish materiallari ishlab chiqarish va ekologik muammolarini hal etishga qaratilgan amaliy tadqiqotlar ulushini koʻpaytirish boʻyicha topshiriqlar berildi.