Oʻzbekiston oliy taʼlim muassasalarida samarali boshqaruvni rivojlantirish masalalari muhokama qilindi
2026-06-22 21:25:00 / Vazirlik yangiliklari

Uchrashuv davomida tomonlar Oʻzbekiston va Buyuk Britaniya oʻrtasida oliy taʼlim sohasidagi hamkorlikni yanada rivojlantirish, oliy taʼlim muassasalarida zamonaviy boshqaruv mexanizmlarini joriy etish hamda xalqaro tajribalarni tatbiq etish masalalarini muhokama qildilar.
J. Gulyamova 2023–2026-yillarda amalga oshirilgan Universitet boshqaruv kodeksi loyihasi natijalari haqida maʼlumot berdi. Qayd etilganidek, loyiha doirasida davlat oliy taʼlim muassasalari hamda xalqaro universitetlarni oʻz ichiga olgan 17 ta oliy taʼlim tashkiloti ishtirok etgan.
Taʼkidlanganidek, mazkur loyiha universitetlarda samarali va shaffof boshqaruv tizimini shakllantirish, strategik rejalashtirishni takomillashtirish hamda taʼlim sifatini oshirishga xizmat qiladi.
Uchrashuvda Oliy taʼlim, fan va innovatsiyalar vazirligi huzuridagi Universitet boshqaruvi boʻyicha ishchi guruh, Britaniya Kengashi va QAA (Quality Assurance Agency for Higher Education – Oliy taʼlim sifati kafolati agentligi) ekspertlari hamkorligida ishlab chiqilgan “Oliy taʼlim muassasalarida samarali boshqaruvni tashkil etish toʻgʻrisidagi qoidalar” loyihasi ham koʻrib chiqildi.
Tomonlar ushbu hujjatni oliy taʼlim tizimida joriy etish istiqbollari, uni amalga tatbiq etish mexanizmlari hamda universitetlarda korporativ boshqaruv madaniyatini yanada rivojlantirish masalalari yuzasidan fikr almashdilar.
Uchrashuv yakunida tomonlar oliy taʼlim sohasidagi hamkorlikni kengaytirish, xalqaro tajribalarni joriy etish va universitetlar boshqaruvi samaradorligini oshirish boʻyicha qoʻshma tashabbuslarni davom ettirishga tayyor ekanliklarini bildirdilar.



