Madridda O‘zbekiston–Ispaniya universitetlari rektorlari birinchi forumi tashkil etildi
2026-06-11 17:00:00 / Vazirlik yangiliklari
Tantanali marosimni O‘zbekistonning Ispaniyadagi Favqulodda va Muxtor Elchisi Farrux Tursunov, Toshkentdagi Vestminster xalqaro universiteti rektori Komiljon Karimov, Ispaniya Ta’limni xalqarolashtirish xizmati (SEPIE) vakillari hamda Rey Xuan Karlos universiteti rahbari ochib berdi.
Anjumanda oliy ta’lim, ilm-fan va akademik almashinuv yo‘nalishlaridagi hamkorlik istiqbollari muhokama qilinib, universitetlararo aloqalarni mustahkamlash hamda yangi qo‘shma loyihalarni yo‘lga qo‘yish masalalari ko‘rib chiqildi.
O‘zbekiston tomonidan 38 nafar oliy ta’lim muassasasi vakillari forum doirasidagi qator tadbir va uchrashuvlarda ishtirok etmoqda.
O‘tkazilayotgan sessiya, uchrashuv va muzokaralarda ikki mamlakat oliy ta’lim muassasalari o‘rtasida yangi hamkorlik aloqalarini yo‘lga qo‘yish hamda istiqbolli loyihalarni amalga oshirish masalalari muhokama qilinmoqda.
Ispaniyaning Madrid va Barselona shaharlarida ikki davlatning oliy ta’lim muassasalari rahbarlari, ta’lim tashkilotlari vakillari hamda xalqaro ekspertlar ishtirokida o‘tkazilayotgan mazkur xalqaro forum 13-iyunga qadar davom etadi.