Vazir Hindiston bilan oliy taʼlim, ilm-fan va innovatsiyalar sohasidagi ikki tomonlama hamkorlik aloqalarimiz uzoq yillik doʻstlik va keng madaniy aloqalar tamoyillari asosida shakllanganini taʼkidladi.

Xususan, hamkorlikdagi eng muhim yoʻnalishlardan biri doimo hind, bengal va urdu tillarini oʻrganish, Hindiston va Markaziy Osiyo mamlakatlari tarixi, madaniyati va adabiyoti boʻyicha tadqiqotlar, tibbiyot va axborot texnologiyalari hamda taʼlim ekanligiga alohida urgʻu berildi.

Shu bilan birga, tomonlar Oʻzbekistonda tibbiyot sohasida tahsil olayotgan hindistonlik talabalar uchun yaratilayotgan sharoitlar va imkoniyatlar toʻgʻrisida toʻxtalib, oʻz vataniga qaytgan hindistonlik yosh shifokorlarning mehnat bozorida bandlik darajasi boʻyicha maʼlumotlar elchi Smita Pant xonim tomonidan tez fursatlarda taqdim etilishi bildirdi.

Shu bilan birga, vazir ITEC dasturi doirasida stajirovkaga yuborish uchun kvotalar sonini koʻpaytirish hamda Hindistonning Javaxarlal Neru universitetida Oʻzbek tili va madaniyati markazini tashkil etish taklifini berdi. Mazkur taklif elchixona vakillari tomonidan qoʻllab-quvvatlandi.

Maʼlumot uchun, 1993-yildan boshlab 2 500 dan ortiq mutaxassislar ITECning turli oʻquv dasturlarida (ingliz tili, bank ishi, kichik biznes va xususiy tadbirkorlik, menejment, qishloq xoʻjaligi va boshqa sohalar) qatnashgan.