QAA bilan taʼlim sifati kafolati sohasidagi hamkorlik masalalari muhokama qilindi
2026-05-22 10:00:00 / Vazirlik yangiliklari

Quality Assurance Agency for Higher Education (QAA) Buyuk Britaniyada oliy taʼlim sifati, akademik standartlar va universitetlar faoliyati samaradorligini baholash bilan shugʻullanuvchi nufuzli tashkilot hisoblanadi. Tashkilot taʼlim sifati monitoringi, institutsional baholash, metodik koʻrsatmalar va universitetlarni qoʻllab-quvvatlash mexanizmlari orqali oliy taʼlim tizimida ishonch va sifat madaniyatini shakllantirishga xizmat qiladi.
Uchrashuvda Oʻzbekiston oliy taʼlim tizimida taʼlim sifati kafolatini takomillashtirish, universitetlarda ichki sifat nazorati tizimlarini rivojlantirish va xalqaro akademik standartlarni joriy etish masalalari muhokama qilindi.
Tomonlar tashqi va ichki sifat kafolati tizimlari, universitetlarda akademik standartlarni taʼminlash, taʼlim dasturlari sifatini baholash va talabalar natijadorligini oshirish boʻyicha hamkorlik imkoniyatlarini muhokama qildilar. Shuningdek, universitetlarda sifat madaniyatini shakllantirish, taʼlim jarayonini doimiy takomillashtirish va akademik rahbarlikni kuchaytirish masalalariga alohida eʼtibor qaratildi.
Uchrashuvda universitet rahbarlari va sifat nazorati boʻlinmalari xodimlari uchun malaka oshirish dasturlarini tashkil etish, Buyuk Britaniyaning Higher Education Quality Code tizimini oʻrganish hamda qoʻshma va transmilliy taʼlim dasturlari sifatini taʼminlash mexanizmlarini rivojlantirish boʻyicha fikr almashildi.
Shuningdek, Oʻzbekistonda bir guruh universitetlar ishtirokida pilot diagnostika va ekspert baholash tizimini yoʻlga qoʻyish, taʼlim sifati boʻyicha milliy yoʻriqnomalarni ishlab chiqishda ekspert koʻmagi koʻrsatish hamda transmilliy taʼlim dasturlari boʻyicha qoʻshma seminarlar tashkil etish taklif etildi.
Uchrashuv yakunida tomonlar taʼlim sifati, akademik shaffoflik va universitetlarda ishonchli sifat madaniyatini shakllantirish boʻyicha amaliy hamkorlikni rivojlantirishdan manfaatdor ekanliklarini bildirdilar.






