Buyuk Britaniya universitetlarining xalqaro hamkorlik boʻyicha milliy uyushmasi bilan uchrashuv
2026-05-21 13:55:00 / Vazirlik yangiliklari

Mazkur tashkilot Buyuk Britaniya oliy taʼlim muassasalarining xalqaro faoliyatini muvofiqlashtirish, universitetlararo sherikliklarni rivojlantirish, akademik mobillik, qoʻshma taʼlim dasturlari va ilmiy hamkorlikni qoʻllab-quvvatlash bilan shugʻullanadi.
Uchrashuvda Oʻzbekiston va Buyuk Britaniya oliy taʼlim muassasalari oʻrtasidagi institutsional hamkorlikni yanada kengaytirish, qoʻshma taʼlim dasturlari, ikki diplomli taʼlim, akademik mobillik va ilmiy tadqiqotlar sohasidagi aloqalarni rivojlantirish masalalari muhokama qilindi.
Tomonlar universitetlar boshqaruvi va taʼlim sifatini taʼminlash, tadqiqot va innovatsiyalarni rivojlantirish, shuningdek, talabalar mobilligini kuchaytirish boʻyicha hamkorlik imkoniyatlarini muhokama qildi. Britaniya universitetlarining institutsional boshqaruv, tadqiqot infratuzilmasi va ish beruvchilar bilan integratsiya boʻyicha tajribasi Oʻzbekiston uchun muhim ahamiyatga ega ekani taʼkidlandi.
Uchrashuv davomida Britaniya universitetlari uchun Oʻzbekiston oliy taʼlim tizimi imkoniyatlariga bagʻishlangan maxsus onlayn davra suhbati tashkil etish, manfaatdor universitetlarni ustuvor yoʻnalishlar boʻyicha oʻzaro bogʻlash hamda Oʻzbekiston–Buyuk Britaniya oliy taʼlim hamkorligi dasturini ishlab chiqish taklif etildi.
Maʼlumot uchun, Jeymi Errousmit 2022-yildan buyon Universities UK International direktori sifatida faoliyat yuritib kelmoqda. U Buyuk Britaniya oliy taʼlim sohasida xalqaro hamkorlik va universitetlararo aloqalarni rivojlantirish boʻyicha katta tajribaga ega.





