O‘zbekiston Respublikasi Oliy taʼlim, fan va innovatsiyalar vazirligi

Uchrashuvda tomonlar Oʻzbekiston va Yaponiya oliygohlari oʻrtasida  mustahkam hamkorlik oʻrnatilganini, bu boradagi aloqalarni yanada rivojlantirish lozimligini qayd etdilar. 

Oʻzbekistonlik professor-oʻqituvchilarning Yaponiyada stajirovka va malaka oshirish kurslarida muntazam qatnashib kelmoqdalar. Ayni paytda mamlakatimizning 6 ta oliygohida talabalarga yapon tili asosiy taʼlim yoʻnalishi hamda birinchi va ikkinchi chet tili sifatida oʻqitilmoqda. 

“Yaponiya Hukumatining begʻaraz yordami doirasida Inson  resurslarini rivojlantirish uchun stipendiyalar ajratish” (JDS) loyihasi doirasida 390 kishi Yaponiyaga yuborildi hamda 382 nafari magistratura, 8 nafari doktorantura Yaponiyada tahsil olib qaytishdi.  

Oʻzbekiston–Yaponiya raqamli universitetida hozirda  535 nafar talaba tahsil olmoqda. Bundan tashqari, Toshkent davlat texnika universitetida Oʻzbekiston–Yaponiya yoshlar innovatsion markazi faoliyat yuritmoqda.

Uchrashuvda  transport, mashinasozlik, arxitektura va qurilish, geologiya, innovatsion texnologiyalar, metallurgiya, energetika, qayta tiklanadigan energiya manbalari texnologiyalari kabi jadal sanoat rivojlanishiga hissa qoʻshadigan sohalar uchun yuqori malakali kadrlar tayyorlash boʻyicha  Yaponiya universitetlari bilan hamkorlik oʻrnatish masalasi muhokama qilindi. 

Oʻzbekiston va Yaponiyada muntazam oʻtkazib kelinayotgan Oʻzbekiston va Yaponiya universitetlari rektorlari Forumida Gifu prefekturasida faoliyat yuritayotgan universitetlar rahbarlarning ishtirokini taʼminlash orqali oʻzaro aloqalarni mustahkamlanishi taʼkidlandi. 

Shuningdek, qoʻshma ilmiy-amaliy markazlar va laboratoriyalar, muhandislik maktablari va texnoparklar, qoʻshma ilmiy konferensiyalar tashkil etish, Yaponiya universitetlari negizida professor-oʻqituvchilar malakasini oshirish masalalari muhokama qilindi.