Oliy ta’lim, fan va innovatsiyalar vaziri Webster universiteti rahbariyati bilan uchrashdi
2026-05-20 14:20:00 / Vazirlik yangiliklari
Uchrashuvda Webster universiteti bilan o‘zaro hamkorlikning bugungi natijalari hamda istiqboldagi rejalar muhokama qilindi. Ta’kidlanganidek, 2019-yildan buyon universitetning Toshkentdagi filialida talabalar soni 360 nafardan 7 ming nafarga yetdi.

Shuningdek, filial ketma-ket uch yil davomida “Yil brendi” unvoniga sazovor bo‘ldi. Bu o‘zaro ishonchli aloqa, ilg'or o‘quv dasturlari va ta‘lim tizimiga qartilgan e‘tiboring amaldagi natijasidir.
Muloqot davomida yangi kampus qurilishi, ta’lim infratuzilmasini kengaytirish hamda xalqaro standartlarga mos yaxlit ta’lim ekotizimini shakllantirish masalalariga alohida e’tibor qaratildi.
Qayd etilishicha, hukumat qarori asosida universitet ehtiyojlari uchun 20 gektar yer maydoni ajratilgan bo‘lib, unda 4 800 o‘rinli o‘quv binosi va 500 o‘rinli talabalar turar joyi barpo etilmoqda.
Tomonlar o‘rtasida Xalqaro boshqaruv xizmatlari to‘g‘risidagi bitim (IMSA)ni yangi shartlar asosida uzaytirish bo‘yicha kelishuvga erishilgani ham qayd etildi. Mazkur hujjatlar ikki tomonlama hamkorlikni yangi bosqichga olib chiqishi ta’kidlandi.
Uchrashuv yakunida tomonlar oliy ta’lim, ilm-fan va innovatsiyalar yo‘nalishidagi qo‘shma tashabbuslarni izchil davom ettirishga kelishib oldilar.






