O‘zbekiston Respublikasi Oliy taʼlim, fan va innovatsiyalar vazirligi

Uchrashuvda Oʻzbekiston oliy taʼlim muassasalari va ilmiy tashkilotlari bilan akademik hamkorlikni kengaytirish, xalqaro ilmiy resurslardan foydalanish imkoniyatlarini oshirish masalalari muhokama qilindi.

Suhbat davomida Oxford University Pressʼning ilmiy tadqiqotlar, taʼlim va ingliz tilini oʻqitish sohalaridagi faoliyati, shuningdek, Oxford Academic raqamli platformasining imkoniyatlari haqida fikr almashildi. Qayd etilganidek, mazkur platforma dunyodagi yetakchi akademik resurslardan biri boʻlib, tadqiqotchilar, professor-oʻqituvchilar, talabalar va ilmiy muassasalar uchun keng qamrovli ilmiy jurnallar, kitoblar hamda tadqiqot materiallarini taqdim etadi.

Uchrashuvda Oʻzbekistonda ilmiy tadqiqotlar sifati va akademik madaniyatni yanada rivojlantirish maqsadida Oxford Academic resurslaridan foydalanish boʻyicha pilot dasturlarni yoʻlga qoʻyish, yetakchi universitetlar uchun institutsional kirish imkoniyatlarini yaratish hamda doktorantlar va yosh olimlar uchun akademik yozuv, xalqaro jurnallarda maqola tayyorlash va publikatsion etika boʻyicha amaliy treninglar tashkil etish yuzasidan takliflar koʻrib chiqildi.

Shuningdek, milliy ilmiy jurnallar tahririyatlari salohiyatini oshirish, xalqaro retsenziya standartlarini joriy etish, antiplagiat tizimlaridan samarali foydalanish hamda oʻzbek oliy taʼlim muassasalarining xalqaro akademik maydondagi raqobatbardoshligini kuchaytirish masalalari muhokama qilindi.

Tomonlar Oʻzbekiston va Oxford University Press oʻrtasida uzoq muddatli va amaliy hamkorlikni yoʻlga qoʻyish, jumladan, taʼlim va ilm-fan sohalarida zamonaviy xalqaro tajribani keng joriy etish boʻyicha hamkorlikni davom ettirishga tayyor ekanini bildirdilar.