Qashqadaryoda “TalabaExpo–2026”: yoshlar bandligi va istiqbolli karyera sari
2026-05-07 11:05:00 / Vazirlik yangiliklari
Bugungi kunda oliy taʼlim muassasalari bitiruvchilarini munosib ish bilan taʼminlash va ularning kasbiy trayektoriyasini toʻgʻri belgilash davlat siyosatining ustuvor yoʻnalishlaridan biri hisoblanadi. “TalabaExpo–2026” koʻrgazmasi aynan shu maqsad yoʻlida Oʻzbekiston Milliy banki, Oliy taʼlim, fan va innovatsiyalar vazirligi, Qashqadaryo viloyati hokimligi, Savdo-sanoat palatasi hamda Yoshlar ishlari agentligining yaqin hamkorligida tashkil etildi.
Tadbirning ochilish marosimida Qashqadaryo viloyati hokimi ishtirok etib, Prezidentimiz tomonidan yoshlar uchun yaratilayotgan keng koʻlamli shart-sharoitlarga toʻxtalib oʻtdi.
“Bugungi koʻrgazma – shunchaki tadbir emas, balki talaba-yoshlarning oʻz iqtidorini namoyish etishi, munosib ish topishi va oʻz biznes loyihalarini yoʻlga qoʻyishi uchun mustahkam platformadir. Bizning bosh maqsadimiz – har bir bitiruvchini ish beruvchi bilan yuzma-yuz uchrashtirish va ularning ertangi kuniga boʻlgan ishonchini mustahkamlashdir”, – dedi viloyat rahbari.
Bu galgi “TalabaExpo” koʻrgazmada viloyat va respublika miqyosidagi 140 dan ortiq yirik korxona va tashkilotlar oʻz stendlari bilan ishtirok etmoqda.
Bitiruvchilar uchun 1000 dan ziyod haqiqiy ish oʻrinlari taklif etiladi. Shuningdek, hali oʻqishni tamomlamagan talabalar uchun haq toʻlanadigan amaliyot va stajirovka dasturlari taqdim etilmoqda.
Tadbirda nafaqat tayyor ish topish, balki oʻz biznesini boshlash istagida boʻlgan yoshlar uchun imtiyozli kreditlar, subsidiyalar va tadbirkorlik boʻyicha mutaxassislarning bepul konsultatsiyalari tashkil qilinadi.