Yevropa klinikalarida oʻzbekistonlik tibbiyot kadrlarini ish bilan taʼminlash masalalari muhokama qilindi
2026-05-06 19:00:00 / Vazirlik yangiliklari

Kompaniya vakillari oʻz faoliyati, Yevropa Ittifoqi mamlakatlaridagi klinikalar tarmogʻi hamda tibbiy kadrlarga boʻlgan ehtiyoj haqida maʼlumot berib, Oʻzbekiston bilan amaliy hamkorlikni yoʻlga qoʻyishga qiziqish bildirdilar.
Muzokaralarda Oʻzbekistondagi tibbiyot oliy taʼlim muassasalari bitiruvchilarini Polsha, Slovakiya va Chexiya kabi davlatlardagi klinikalarda ish bilan taʼminlash imkoniyatlari koʻrib chiqildi. Kompaniya tomonidan mazkur mamlakatlarda oʻzbekistonlik yosh mutaxassislar uchun ehtiyoj mavjudligi qayd etildi.
Shuningdek, uchrashuvda tibbiyot yoʻnalishida tahsil olayotgan talabalar uchun Yevropa mamlakatlarida stajirovkalar tashkil etish masalasi ham muhokama qilindi. Kompaniya vakillari talabalarni klinikalar faoliyati, zamonaviy tibbiy xizmat koʻrsatish standartlari va xalqaro mehnat bozori talablari bilan yaqindan tanishtirish boʻyicha hamkorlik qilishga tayyor ekanliklarini bildirdilar.
Tomonlar kasbiy taʼlim sohasida, xususan hamshiralik ishi yoʻnalishida hamkorlik qilish istiqbollariga ham alohida toʻxtaldilar. Bunda tibbiyot texnikumlari bitiruvchilarining amaliy koʻnikmalarini xalqaro standartlar asosida rivojlantirish va ularni xorijiy klinikalarda ish bilan taʼminlashga qaratilgan qoʻshma loyihalarni amalga oshirish imkoniyatlari muhokama qilindi.
Uchrashuv yakunida bildirilgan takliflarni batafsil oʻrganish, hamkorlikning aniq mexanizmlarini ishlab chiqish hamda tibbiyot oliy taʼlim muassasalari va professional taʼlim tashkilotlari ishtirokida muzokaralarni davom ettirishga kelishib olindi.






