Agromuhandislikda dual taʼlim: nazariya va amaliyotning zamonaviy integratsiyasi
2026-05-01 12:00:00 / Vazirlik yangiliklari
Seminarda Oliy taʼlim, fan va innovatsiyalar vaziri Qoʻngʻirotboy Sharipov, “Oʻzavtosanoat” AJ boshqaruv raisining oʻrinbosari Davron Hidoyatov hamda respublika boʻyicha 20 ga yaqin oliy taʼlim tashkilotlari rektorlari va soha mutaxassislari ishtirok etdilar.
Ishtirokchilar dastlab zavod tomonidan ishlab chiqarilayotgan zamonaviy qishloq xoʻjaligi texnikalari va ularni ishlab chiqarish jarayoni, dunyoga mashhur “Claas” kombaynlari yigʻuv jarayoni va TDAU talabalari uchun yaratilgan dual taʼlim tizimining amaliy natijalari bilan yaqindan tanishdilar.
Eʼtiborli jihati shundaki, ayni paytda zavodda dual taʼlim asosida tahsil olayotgan talabalarga toʻliq ijtimoiy paket taqdim etilmoqda. Jumladan, bepul transport va issiq tushlik, maxsus forma, 3 million soʻmga yaqin oylik maosh.
Ishtirokchilar tomonidan ushbu ijobiy tajribani boshqa oliygohlarda ham keng joriy etish va dual taʼlim tizimining istiqbollari muhokama qilindi.
Asosiy tadbirni Oliy taʼlim, fan va innovatsiyalar vaziri Qoʻngʻirotboy Sharipov kirish soʻzi bilan ochib berar ekan, agrar taʼlim tizimida dual taʼlim modeli oʻz samarasini berayotganini alohida taʼkidladi.
Seminarda “Toshkent traktor zavodi” MCHJ bilan agrosanoat sohasi uchun kadrlar tayyorlovchi oliy taʼlim tashkilotlari oʻrtasida talabalarni amaliyotga jalb qilish va dual taʼlim tizimini rivojlantirish boʻyicha hamkorlik kelishuvlari imzolandi.
Bunday hamkorlik oliy taʼlim muassasalari bitiruvchilarining mehnat bozorida raqobatbardoshligini oshirish, ularning oʻqishni tamomlagan zahoti tayyor mutaxassis sifatida ish boshlashlarini taʼminlashga qaratilgan strategik harakatdir.
Kelishuvga koʻra, talabalar oʻquv vaqtining bir qismini bevosita zavod sexlarida, zamonaviy texnologiyalar va “Claas” kabi dunyoga mashhur brendlar yigʻuv liniyalarida oʻtkazadilar. Har bir talabaga ishlab chiqarish jarayonida tajribali muhandis-mutaxassislar murabbiy sifatida biriktiriladi.