Özbekiston Respublikasi Ta’lim va ilm-fan vazirligi

Aslida talabalar oʻqishini respublikada faoliyat yuritayotgan xorijiy va nodavlat oliy taʼlim tashkilotlaridan davlat oliy taʼlim muassasalariga koʻchirish tartibi Oʻzbekiston Respublikasi Prezidentining 2022-yil 15-iyundagi PQ-279-son qarori bilan tasdiqlangan. Unga koʻra, mos va turdosh taʼlim yoʻnalishlariga koʻchirish uchun talabadan alohida iqtidor talab etiladigan taʼlim yoʻnalishlari boʻyicha kasbiy (ijodiy) imtihonlar, boshqa taʼlim yoʻnalishlari boʻyicha test sinovlari oʻtkaziladi. Bunda, kasbiy (ijodiy) imtihonlar tegishli oliy taʼlim muassasasi tomonidan, test sinovlari Bilim va malakalarni baholash agentligi tomonidan oʻtkaziladi.

Test sinovlari va kasbiy (ijodiy) imtihonlar boʻyicha oʻtish ballari har yili 15-iyulga qadar Oliy taʼlim, fan va innovatsiyalar vazirligi hamda tizimida oliy taʼlim muassasalari boʻlgan vazirlik va idoralar tomonidan belgilanadi hamda Bilim va malakalarni baholash agentligining rasmiy veb-saytida eʼlon qilinadi.

Oʻtish balidan past ball toʻplagan talabalar bakalavriatga qabul qilishdagi tartibga muvofiq tabaqalashtirilgan toʻlov-kontrakt asosida oʻqishga qabul qilinadi.

Davlat oliy taʼlim muassasalarining mos va turdosh boʻlmagan (yaʼni noturdosh) taʼlim yoʻnalishlariga koʻchirish oʻrnatilgan tartibda, tegishli bakalavriat taʼlim yoʻnalishi uchun belgilangan tabaqalashtirilgan toʻlov-kontraktning minimal miqdoriga teng boʻlgan bir martalik toʻlov asosida amalga oshiriladi. Yaʼni, tabaqalashtirilgan toʻlov-kontraktning minimal miqdori har yili Davlat komissiyasi tomonidan belgilanadi. Misol uchun, 2023/2024-oʻquv yili uchun tabaqalashtirilgan toʻlov-kontraktning minimal miqdori yoʻnalishga qarab bazaviy toʻlov-kontrakt miqdorining 8 baravaridan 25 baravarigacha etib belgilangan edi.

Shu oʻrinda, oʻqishni koʻchirish jarayonida namunaviy oʻquv rejalaridagi umumkasbiy va ixtisoslik (mutaxassislik) fanlari boʻyicha farqlar 4 tadan oshganda fuqaroning oʻqishini koʻchirish va qayta tiklash haqidagi arizasiga rad javobi beriladi yoki GPA oʻtish ballini toʻplay olmagan talaba sifatida qayta oʻqish uchun tegishli kursda qoldirish taklifi beriladi. Bunda kursdan-kursga qolgan talabalar faqat qarzdor boʻlgan fanlarni oʻzlashtirib ularga mos ravishda shartnoma mablagʻlarini toʻlaydi.

Yuqoridagilardan kelib chiqib, oʻqishini koʻchirmoqchi boʻlgan talabalar ushbu jarayon boʻyicha yangiliklarni vazirlikning @eduuz rasmiy sahifalari orqali bilib olishlari, savollar yuzasidan 1006 Ishonch telefon raqami orqali mutaxassislardan javob olishlari mumkin.