Termizda talaba yoshlar oʻrtasida “Vazir kubogi” futbol musobaqasi boshlandi
2026-04-22 21:00:00 / Vazirlik yangiliklari
Musobaqaning asosiy maqsadi xotin-qizlarni sportga keng jalb etish, ularning jismoniy faolligini oshirish hamda yoshlar oʻrtasida sogʻlom turmush tarzini targʻib qilishdan iborat. Shuningdek, ushbu musobaqa orqali talabalar oʻrtasida doʻstona munosabatlarni mustahkamlash va sogʻlom raqobat muhitini shakllantirish koʻzda tutilgan.
Tadbirda Oliy taʼlim, fan va innovatsiyalar vaziri Qoʻngʻirotboy Sharipov soʻzga chiqib, mazkur musobaqaning ahamiyatiga alohida toʻxtalib oʻtdi.
— Bugungi tadbirlar doirasida talaba-qizlar oʻrtasida futbol sport turi boʻyicha “Vazir kubogi” musobaqalarining tashkil etilayotganida oʻziga xos ramziy maʼno bor. Chunki, bugun davlatimiz rahbari tomonidan xotin-qizlarimizga yaratib berilayotgan shart-sharoitlar, ularni har tomonlama qoʻllab-quvvatlash borasidagi islohotlar har bir taʼlim muassasasida oʻzining amaliy ifodasini topishi lozim, — dedi vazir.
Shuningdek, u barcha ishtirokchilarni sport orqali Vatanga xizmat qilishga, doimiy ravishda oʻz ustida ishlashga va boshqalarga ibrat boʻlishga chaqirdi. Yoshlar oldiga qoʻyilgan vazifalarni sidqidildan, tashabbuskorlik va fidoiylik bilan amalga oshirish muhimligi alohida qayd etildi.
Qizgʻin va murosasiz kechishi kutilayotgan bahslarda jamoalar gʻalaba uchun bor kuch va mahoratlarini namoyon etmoqda. Musobaqa yakunida eng kuchli jamoalar aniqlanib, gʻolib va sovrindorlar munosib taqdirlanadi.