O‘zbekiston Respublikasi Oliy taʼlim, fan va innovatsiyalar vazirligi

Yigʻilish davomida Mashgʻulotlarning milliy klassifikatorini modernizatsiya qilish masalasi muhokama qilinib, zarur chora-tadbirlar belgilab olindi. Mutaxassislar tomonidan taʼlim va fan sohasiga oid kasb hamda lavozimlarni mehnat bozorining bugungi shiddatli talablari asosida qayta koʻrib chiqish zarurati mavjudligi qayd etildi. Asosiy eʼtibor raqamli iqtisodiyot sharoitida yuzaga kelayotgan yangi kompetensiyalar va zamonaviy kasblarni tizimga izchil integratsiya qilishga qaratildi.

Shuningdek, muhokamalarda professor-oʻqituvchilar va sohaga aloqador boshqa lavozimlar uchun Xizmatchilar lavozimlarining malaka maʼlumotnomasini ishlab chiqish masalasi koʻrib chiqildi. 

Soʻnggi tahlillar shuni koʻrsatmoqdaki, davlat va nodavlat oliygohlarda lavozimlar nomlanishi va vazifalarida yagona yondashuv mavjud emas, shuningdek, funksional majburiyatlarda takrorlanishlar va vazifalarning aniq chegaralanmagani kuzatilmoqda va malaka talablarini belgilashda tarqoqlik mavjud.

Ushbu boʻshliqlarni toʻldirish maqsadida, har bir lavozim boʻyicha aniq funksional vazifalar, zarur bilim, koʻnikma va kompetensiyalarni tizimli belgilovchi yagona hujjat loyihasini tayyorlash belgilandi.

Ishchi guruh aʼzolari sohada kadrlar siyosatini takomillashtirish, lavozim yoʻriqnomalaridagi noaniqliklarni bartaraf etish va yagona professional standartlarni joriy etishga kelishdilar.

Yigʻilish yakunida ishlarni aniq reja-grafik asosida tashkil etish, jarayonga soha ekspertlari va ish beruvchilarni keng jalb qilish va tegishli normativ-huquqiy hujjat loyihasini tayyorlash boʻyicha muhim qarorlar qabul qilindi.