Namanganda “Sunʼiy intellekt” laboratoriyasi: innovatsiyalar sari yana bir qadam
2026-04-16 18:00:00 / Vazirlik yangiliklari
Oliy taʼlim, fan va innovatsiyalar vaziri Qoʻngʻirotboy Sharipov Namangan davlat texnika universitetida barpo etilayotgan zamonaviy “Sunʼiy intellekt” ilmiy laboratoriyasi qurilish jarayonlari bilan yaqindan tanishdi. Tashrif davomida obyektda amalga oshirilayotgan ishlar, bunyodkorlik surʼatlari hamda loyihaning amaliy yechimlari atroflicha koʻzdan kechirildi.
Vazir laboratoriyani eng ilgʻor talablar asosida shakllantirish, uning infratuzilmasini xalqaro standartlarga muvofiq jihozlash hamda ilmiy-amaliy faoliyat uchun barcha zarur sharoitlarni yaratish yuzasidan aniq topshiriq va tavsiyalar berdi. Ayniqsa, laboratoriya faoliyatini real sektor ehtiyojlari bilan uzviy bogʻlash, yoshlar va tadqiqotchilar uchun samarali innovatsion muhitni shakllantirish masalalariga alohida urgʻu qaratildi.
Qayd etilishicha, mazkur loyiha Oʻzbekiston Respublikasi Prezidentining PF–189-son Farmoni ijrosi doirasida amalga oshirilmoqda. Yangi laboratoriya Smart City, transport, sanoat, qishloq xoʻjaligi, taʼlim va startaplar yoʻnalishlarida sunʼiy intellekt yechimlarini ishlab chiqishga ixtisoslashadi.