O‘zbekiston Respublikasi Oliy taʼlim, fan va innovatsiyalar vazirligi

Anjumanda Oliy ta’lim, fan va innovatsiyalar vaziri Qo‘ng‘irotboy Sharipov, vazirning birinchi o‘rinbosari Sardor Rajabov, shuningdek, tizim rahbar-xodimlari tomonidan mazkur hujjatda belgilangan ustuvor yo‘nalishlar yuzasidan ma’lumot berildi. Xususan, “5T” tamoyili, “U10” dasturi, milliy reyting tizimi, ilmiy faoliyatni moliyalashtirishning yangi mexanizmlari va raqamli ta’limni rivojlantirish masalalari yig'ilganlarga tushuntirildi.

Tadbir doirasida 2026-yilning 1-choragi davomida Prezident hamda hukumat hujjatlarida belgilangan topshiriqlarning vazirlik va tizim tashkilotlari tomonidan ijro etilish holati haqida ham hisobot berildi. Jumladan, shu yilning birinchi choragida vazirligimizga “Ijro.gov.uz” tizimi orqali Prezidentimiz va Hukumat tomonidan umumiy hisobda 532 ta aniq vazifalar yuklatildi. Xususan, Prezidentning 152 ta hujjati doirasida vazirlik zimmasiga jami 484 ta topshiriq, hukumatimizning 17 ta hujjati asosida yuklatilgan 48 ta topshiriq bajarildi.

Mazkur topshiriqlarning har biri ortida xalqimiz manfaati, taʼlim va ilm-fan kelajagi turgani, shu sababli, vazirlik rahbariyati bu masalaga oʻta jiddiy eʼtibor qaratayotgani qayd etildi.

Matbuot anjumani ochiq va konstruktiv ruhda o‘tdi. Jurnalistlar va ommaviy axborot vositalari vakillari tomonidan berilgan ko‘plab savollarga mutasaddilar batafsil javoblar berishdi. Asosiy e'tibor va keng muhokamalar oliy ta’lim muassasalari faoliyatini baholash mezonlari, xalqaro hamkorlikni kengaytirish, xorijiy talabalarni jalb etish hamda ilmiy ishlanmalarni samarali tijoratlashtirish masalalariga qaratildi.

 Tadbir yakunida yangi farmon oliy ta’lim tizimini sifat jihatidan yangi bosqichga olib chiqishi, ilm-fan va innovatsiyalarni iqtisodiyot bilan chambarchas bog‘lashga xizmat qilishi alohida ta’kidlandi.