Markaziy Osiyo – Yevropa Ittifoqi universitetlari kongressi oʻz ishini boshladi
2026-04-13 11:00:00 / Vazirlik yangiliklari
Maʼlumot uchun, Kongressda Yevropa Ittifoqi davlatlaridan 45 ta universitetdan 80 nafardan ortiq vakillar, Markaziy Osiyo davlatlaridan 20 dan ortiq universitetdan 40 nafardan ziyod ishtirokchilar, shuningdek Oʻzbekistondan 80 dan ortiq oliy taʼlim muassasalaridan 200 nafardan ziyod vakillar qatnashmoqda.
Kongressning rasmiy ochilish marosimida Oʻzbekiston Respublikasi Prezidenti Administratsiyasi rahbari oʻrinbosari Ilhom Siradjev, Oʻzbekiston Respublikasi Oliy taʼlim, fan va innovatsiyalar vaziri Qoʻngʻirotboy Sharipov, Oʻzbekiston Respublikasi sogʻliqni saqlash vaziri Asilbek Xudayarov, Yevropa Ittifoqining Oʻzbekistondagi elchisi Toyvo Klaar, Polsha Respublikasi fan va oliy taʼlim vaziri Marsin Kulasek, Tojikiston Respublikasi taʼlim va fan vaziri Saidzoda Rahim Hamro, Polsha akademik oliy taʼlim muassasalari rektorlari konferensiyasi (CRASP) prezidenti Bogumila Kanevska hamda IREG Academic Ranking & Excellence Observatory prezidenti Valdemar Sivinski ishtirok etdi. Ular tomonidan taʼlim va ilm-fan sohasidagi sheriklikni chuqurlashtirishga doir fikr va takliflar bildirildi
Maʼlumki, 2025-yil 3–4-aprel kunlari Samarqand shahrida tarixda ilk bor “Markaziy Osiyo — Yevropa Ittifoqi sammiti” oʻtkazilib, unda Yevropa Ittifoqi rahbariyati va Markaziy Osiyo davlatlari yetakchilari tomonidan munosabatlarni strategik sheriklik darajasiga olib chiqish boʻyicha muhim kelishuvlarga erishilgan edi. Bugungi kongress ana shu tarixiy sammitda belgilangan vazifalarning amaliy davomi sifatida tashkil etilmoqda .
Global oʻzgarishlar shiddat bilan kechayotgan sharoitda taʼlim va ilm-fan sohasi xalqaro integratsiyaning hal qiluvchi drayveriga aylanib bormoqda. Shu nuqtayi nazardan, mazkur kongress Yevropa Ittifoqi va Markaziy Osiyo oʻrtasidagi akademik hamkorlikni tizimli va institutsional asosda rivojlantirishga qaratilgan.