Oliy taʼlim tizimida jamoatchilik nazoratini kuchaytirish masalalari muhokama qilindi
2026-04-08 17:00:00 / Vazirlik yangiliklari
Mazkur tadbirda vazirning Tashkiliy-nazorat masalalar bo‘yicha maslahatchisi Aziz Meliboyev, Feruza Rashidova boshchiligidagi vazirlik Jamoatchilik kengashi aʼzolari, Hakamlik sudi raisi Ulug‘murod Ernazarov, respublika oliy taʼlim tashkilotlari vakillari, sohada tajribaga ega mutaxassislar hamda ekspertlar ishtirok etdi. Seminarning asosiy maqsadi – oliy taʼlim tizimida jamoatchilik nazorati mexanizmlarini takomillashtirish, kengashlar faoliyatini mazmunan boyitish va ularning taʼsirchanligini oshirishdan iborat boʻldi.
Tadbir davomida bugungi kunda oliy taʼlim muassasalari faoliyatida ochiqlik va shaffoflikni taʼminlash, jamoatchilik bilan muloqotni kuchaytirish, fuqarolik jamiyati institutlari bilan hamkorlikni kengaytirish masalalariga alohida eʼtibor qaratildi. Shuningdek, jamoatchilik kengashlarining roli faqat maslahat berish bilan cheklanib qolmasdan, taʼlim muassasalari faoliyati ustidan samarali jamoatchilik nazoratini amalga oshirishda muhim institut sifatida qaralishi zarurligi taʼkidlandi.
Seminarda mutaxassislar tomonidan jamoatchilik kengashlari ishini tashkil etishning zamonaviy yondashuvlari, ularning ish rejalarini shakllantirish, jamoatchilik fikrini oʻrganish va tahlil qilish, aholi va talabalar bilan ochiq muloqotni yoʻlga qoʻyish, ommaviy axborot vositalari bilan hamkorlikni kuchaytirish kabi masalalar yuzasidan amaliy tavsiyalar berildi.
Shuningdek, oliy taʼlim tizimida amalga oshirilayotgan islohotlar sharoitida jamoatchilik kengashlari faoliyatini yanada jonlantirish, ularni taʼsirchan va natijador tuzilmaga aylantirish muhim ahamiyat kasb etishi qayd etildi. Bu borada kengashlar faoliyatini tizimli tashkil etish, ularning qarorlar qabul qilish jarayonidagi ishtirokini kengaytirish va ijtimoiy ahamiyatga ega masalalarni hal etishda faol ishtirokini taʼminlash zarurligi taʼkidlandi.
Tadbir yakunida ishtirokchilar oʻzaro fikr almashib, mavjud muammolar va ularning yechimlari yuzasidan takliflar bildirdilar. Seminar doirasida bildirilgan taklif va tavsiyalar kelgusida jamoatchilik kengashlari faoliyatini yanada takomillashtirishga xizmat qilishi qayd etildi.
Mazkur amaliy seminar oliy taʼlim tizimida ochiqlik va shaffoflikni taʼminlash, jamoatchilik ishtirokini kengaytirish hamda samarali jamoatchilik nazorati mexanizmlarini shakllantirish yoʻlidagi muhim qadamlardan biri boʻldi.