Yarimo‘tkazgichlar sohasida kadrlar tayyorlashda hamkorlik masalalari muhokama qilindi
2026-04-01 16:00:00 / Vazirlik yangiliklari

Uchrashuv davomida yarimo‘tkazgichlar sohasida kadrlar tayyorlashni rivojlantirishga qaratilgan “IC Design Fundamentals and Skills Development Training Program” (IC dizayni bo‘yicha bilim va ko‘nikmalarni rivojlantirish o‘quv dasturi)ni amalga oshirish masalalari atroflicha muhokama qilindi.
Tomonlar joriy yilning 30-martidan 4-apreliga qadar malayziyalik mutaxassislar ishtirokida Toshkent shahridagi Turin politexnika universiteti bazasida nomzodlar uchun tashkil etilgan o‘quv seminarlarining borishi hamda yakuniy natijalari yuzasidan fikr almashdilar.
Shuningdek, yarimo‘tkazgichlar sanoati uchun kasbiy va oliy ta’lim tizimida malakali kadrlar tayyorlash, zamonaviy ta’lim dasturlarini ishlab chiqish va takomillashtirish masalalari muhokama qilindi.
Uchrashuv yakunida tomonlar mazkur yo‘nalishda o‘zaro manfaatli hamkorlikni yanada rivojlantirish, xususan, yarimo‘tkazgichlar sohasida yuqori malakali mutaxassislar tayyorlash bo‘yicha yaqin hamkorlikni yo‘lga qo‘yish borasida kelishuvga erishdilar.



