Toshkentda oliy ta’lim muassasalarida rezerv va zaxira ofitserlarni tayyorlash tizimi o‘rganildi
2026-03-31 17:50:00 / Vazirlik yangiliklari
Majlisda ta’kidlanganidek, mamlakat mudofaa salohiyatini oshirish, harbiy harakatlar davrida qo‘shinlarni malakali komandirlar bilan to‘ldirish, harbiy hisob ixtisosliklarini mustahkamlash va zamonaviy qurol-aslahalarni boshqara oladigan ofitserlar tayyorlash maqsadida O‘zbekiston Milliy universiteti Harbiy tayyorgarlik o‘quv markazi va Nizomiy nomidagi O‘zbekiston milliy pedagogik universiteti Harbiy ta’lim fakultetida amaldagi qonunchilikka muvofiq 33 ta yo‘nalish bo‘yicha 1 068 nafar rezerv va zaxira ofitser tayyorlanmoqda.
Zamonaviy tahdidlarni hisobga olgan holda o‘quv dasturlari boyitilib, Qurolli Kuchlarda amalga oshirilayotgan islohotlar, yangi jang usullari, zamonaviy qurol-yarog‘ va texnikalar, uchuvchisiz uchish apparatlari, robotlashtirilgan vositalar hamda ulardan himoyalanish usullari o‘quv jarayoniga joriy etilgan. Ta’lim muassasalarida 200 dan ortiq o‘quv-modiy texnik bazalar yaratilib, dala-o‘quv maydonlarida amaliy mashg‘ulotlar tashkil etilmoqda.
Harbiy tayyorgarlikni muvaffaqiyatli yakunlagan talabalarga “leytenant” unvoni berilib, ular haqiqiy harbiy xizmatga chaqiriladi yoki rezerv va zaxiraga o‘tkaziladi. Shu bilan birga, o‘rganishlar va huquqni qo‘llash amaliyoti ayrim muammolarni ko‘rsatmoqda, xususan, harbiy tayyorgarlikdan o‘tish istagida bo‘lgan xotin-qizlar huquqlari yetarli darajada kafolatlanmaganligi va tibbiy ko‘rik mexanizmlari hamda hududiylik prinsiplari aniq belgilanmagani qayd etildi.
Senatorlar amaldagi qonun hujjatlarini takomillashtirish va probatsiya nazoratini samarali yo‘lga qo‘yish masalalarini ham muhokama qilib, tegishli qarorlarni qabul qildilar.