Vazirning birinchi o‘rinbosari UrDPIda yaratilgan sharoitlar bilan tanishdi va iqtidorli yoshlar bilan muloqot qildi
2026-03-17 10:05:00 / Vazirlik yangiliklari

Dastlab, talabalar turar joyi, “Kelajakka qadam” va texnologik ta’lim yo‘nalishi talabalari uchun mo‘ljallangan “Tikuvchilik” xonalari hamda turli to‘garaklar faoliyati ko‘zdan kechirildi. Shuningdek, institutning Registrator ofisi faoliyati o‘rganilib, yoshlarga ko‘rsatilayotgan xizmatlar sifati va samaradorligiga alohida e’tibor qaratildi. Shu bilan birga, 1000 o‘rinli yangi o‘quv binosi hamda Madaniyat saroyida olib borilayotgan bunyodkorlik ishlari bilan tanishildi.
Shundan so‘ng Sardor Rajabov institutning bir guruh iqtidorli yoshlari bilan uchrashuv o‘tkazdi. Samimiy muloqot davomida mamlakatimiz ta’lim tizimida amalga oshirilayotgan islohotlar, pedagog kadrlar tayyorlash sifatini oshirish hamda o‘qituvchilik kasbining jamiyatdagi o‘rni va mas’uliyati haqida atroflicha fikr yuritildi. Bo‘lajak pedagoglar oldida turgan muhim vazifalar, zamonaviy bilim va ko‘nikmalarni egallash zarurati hamda kasbiy mahoratni muntazam oshirib borish masalalariga alohida to‘xtalib o‘tildi.
Ochiq muloqot tarzida o‘tgan uchrashuv yakunida talabalar o‘zlarini qiziqtirgan barcha savollarga batafsil javob oldilar.








