Dushanbeda O‘zbek tili va madaniyati markazini ochish bo‘yicha kelishuvga erishildi
2026-03-13 21:00:00 / Vazirlik yangiliklari
Uchrashuv doirasida Alisher Navoiy nomidagi Toshkent davlat oʻzbek tili va adabiyoti universiteti hamda Sotim Ulugʻzoda nomidagi Xalqaro chet tillar universiteti oʻrtasida hamkorlik shartnomasi imzolandi. Mazkur kelishuvga muvofiq, kelgusida universitet huzurida Oʻzbek tili va madaniyati markazini tashkil etish rejalashtirilgan.
Toshkent davlat oʻzbek tili va adabiyoti universiteti rektori, akademik Shuhrat Sirojiddinov boshchiligidagi delegatsiya tashrif doirasida mezbon universitetga ilmiy, publitsistik va badiiy yoʻnalishdagi 100 dan ortiq kitoblar hamda oʻzbek xalqining boy tarixiy-madaniy merosini aks ettiruvchi amaliy san’at buyumlarini topshirdi.
Shuningdek, Xalqaro chet tillar universitetida Oʻzbek tili va madaniyati markazini tashkil etish masalalari yuzasidan fikr almashilib, markaz faoliyatini yoʻlga qoʻyish bilan bogʻliq tashkiliy masalalar muhokama qilindi. Markazning rasmiy ochilishi tegishli tashkiliy-huquqiy jarayonlar yakunlangach amalga oshirilishiga kelishib olindi.
Tashrif davomida akademik Shuhrat Sirojiddinov filologiya fakultetining oʻzbek tili yoʻnalishida tahsil olayotgan talabalar hamda professor-oʻqituvchilar bilan ham uchrashuv oʻtkazdi. Ma’ruza davomida til va madaniyat diplomatiyasining ahamiyati, Markaziy Osiyo oliy ta’lim makonida ilmiy-gumanitar hamkorlikni rivojlantirish, shuningdek, o‘zbek tilining xalqaro miqyosdagi nufuzini oshirish masalalari haqida fikrlar bildirildi.
Bundan tashqari, turli darajadagi tinglovchilar uchun oʻzbek tili boʻyicha har oy onlayn mashgʻulotlar tashkil etish yuzasidan ham kelishuvga erishildi. Ushbu tashabbus ikki universitet oʻrtasidagi akademik hamkorlikni yanada kengaytirish hamda oʻzbek tilini xalqaro miqyosda targʻib etishga xizmat qilishi qayd etildi.