Oliy taʼlim tizimida natijaga yoʻnaltirilgan byudjetlashtirish boʻyicha seminar oʻtkazildi
2026-03-12 17:40:00 / Vazirlik yangiliklari
Mazkur seminar Oʻzbekiston Respublikasi Vazirlar Mahkamasining davlat moliyasini boshqarish tizimini takomillashtirishga qaratilgan qarorlari doirasida tashkil etildi. Unda vazirlik markaziy apparati va tizim tashkilotlari rahbar hamda masʼul xodimlari, byudjet dasturlari administratorlari va ijrochilari ishtirok etdi.
Tadbirda Iqtisodiyot va moliya vazirligi hamda xalqaro konsalting tashkiloti — Ernst & Young Advisory LLC (Ecorys Niderlandiya) ekspertlari tomonidan natijaga yoʻnaltirilgan byudjetlashtirish tizimini joriy etishning zamonaviy yondashuvlari, byudjet dasturlari tarkibi va natijadorlik koʻrsatkichlarini shakllantirish masalalari yuzasidan maʼruzalar taqdim etildi.
Seminar davomida ishtirokchilarga dasturlarni amalga oshirishda tashkiliy va boshqaruv mexanizmlari, monitoring va hisobot yuritish tartiblari, shuningdek byudjet dasturlarining samaradorligini baholash va risklarni boshqarish kabi muhim masalalar boʻyicha amaliy tushunchalar berildi.
Shuningdek, tadbir doirasida amaliyotga yoʻnaltirilgan mashgʻulotlar tashkil etilib, ishtirokchilar byudjet dasturlarini rejalashtirish va ularning natijadorligini baholash boʻyicha amaliy topshiriqlarni bajardilar.
Mazkur seminar davlat moliyasini boshqarishda zamonaviy mexanizmlarni joriy etish, byudjet mablagʻlaridan samarali foydalanish va vazirlik tizimida institutsional salohiyatni yanada oshirishga xizmat qiladi.