Qoʻqon universitetida amalga oshirilayotgan ijtimoiy hamkorlik loyihalari, ehtiyojmand oilalar farzandlarini oʻqitish tajribasi va uni joriy etish mexanizmlariga bagʻishlangan seminar oʻtkazildi
2026-03-02 10:10:00 / Vazirlik yangiliklari
Yigʻilishda 24-fevral kuni Prezident Shavkat Mirziyoyev raisligida oʻtkazilgan yoshlarning tashabbuslarini qoʻllab-quvvatlash boʻyicha qoʻshimcha imkoniyatlarga bagʻishlangan yigʻilishda belgilangan vazifalar ijrosi muhokama qilindi.
Tadbirni Oliy taʼlim, fan va innovatsiyalar vaziri Qoʻngʻirotboy Sharipov kirish soʻzi bilan ochib beradi. Shuningdek, Prezident Administratsiyasi rahbari oʻrinbosari Ilhom Sirojov, Oʻzbekiston mahallalari uyushmasi raisi Qahramon Quronboyev, Sport vaziri Adham Ikramov, Yoshlar ishlari agentligi direktori Alisher Saʼdullayev hamda Respublika maʼnaviyat va maʼrifat markazi rahbari Otabek Hasanov ishtirok etdi.
Prezident oʻz nutqida Qoʻqon universiteti tomonidan zamonaviy asbob-uskunalar, texnika va laboratoriyalar bilan jihozlangan 400 oʻrinli oʻquv markazi ishga tushirilganini alohida qayd etgan edi. Ushbu markazda ehtiyojmand oilalar farzandlarini dasturlash, sunʼiy intellekt va robototexnika yoʻnalishlarida 6 oylik bepul kurslarda oʻqitish rejalashtirilgan. Mazkur tashabbus orqali yiliga 5 mingdan ziyod uyushmagan yoshlarni zamonaviy bilimlar bilan qamrab olish imkoniyati yaratilishi taʼkidlangan.
Seminarda ushbu vazifalarni amaliy bosqichga olib chiqish, qamrovni kengaytirish va hududlarda mazkur tajribani ommalashtirish masalalari koʻrib chiqildi.
Qayd etilganidek, Yoshlar ishlari agentligi, Oʻzbekiston mahallalari uyushmasi, Oila va xotin-qizlar qoʻmitasi hamda Qoʻqon universiteti hamkorligida Fargʻona viloyati yoshlarini dasturlash, sunʼiy intellekt, robototexnika va STEAM fanlari boʻyicha bepul oʻqitishga qaratilgan maxsus kurslar tashkil etilmoqda.
Hozirgi kunda universitet huzurida 200 oʻrinli “Yoshlar IT akademiyasi” hamda 1 650 oʻrinli STEAM fanlariga ixtisoslashgan oʻquv binolari barpo etilib, 200 ta zamonaviy kompyuterlar oʻrnatilgan, robototexnika va fizika laboratoriyalari zamonaviy jihozlar bilan taʼminlangan.
Loyiha doirasida 1000 nafardan ortiq yoshlar dasturlash, sunʼiy intellekt, robototexnika, STEAM fanlari hamda ingliz tili boʻyicha bepul taʼlim olmoqda.
Seminar yakunida Prezident tomonidan ilgari surilgan tashabbuslarni toʻliq va samarali amalga oshirish, ehtiyojmand yoshlarni qamrab olish koʻlamini kengaytirish hamda hududiy hamkorlikni kuchaytirish boʻyicha aniq vazifalar belgilab olindi.