Andijon davlat texnika instituti tomonidan mahallalarning “bosh rejasi” ishlab chiqilmoqda
2026-02-26 16:50:00 / Vazirlik yangiliklari

Ushbu maqsadda arxitektura va qurilish yo‘nalishlariga ixtisoslashgan oliy ta’lim muassasalarining professor-o‘qituvchilari hamda talabalari jarayonga keng jalb etilishi belgilandi. Mazkur topshiriqlar ijrosi doirasida Andijon viloyatida og‘ir toifaga kiritilgan jami 52 ta mahallaga Andijon davlat texnika institutining professor-o‘qituvchilari va talabalari biriktirildi. Ular tomonidan har bir mahallaning mavjud holati kompleks ravishda o‘rganilib, hududlarni rivojlantirish bo‘yicha bosh reja loyihalari ishlab chiqiladi. Ushbu bosh rejalar doirasida ichki avtomobil yo‘llarini asfaltlash va ta’mirlash, piyodalar yo‘laklarini barpo etish, ko‘cha yoritish tizimlarini yaxshilash, ichimlik suvi, oqova suv, elektr va gaz ta’minoti tarmoqlarini rekonstruksiya qilish bilan bir qatorda, qurilish va bino-inshoot obyektlarini barpo etish hamda rekonstruksiya qilish bo‘yicha aniq takliflar ishlab chiqilishi ko‘zda tutilmoqda.
Xususan, mahallalarda ijtimoiy ahamiyatga ega bo‘lgan bino va inshootlar, jumladan maktabgacha ta’lim tashkilotlari, umumta’lim maktablari, tibbiyot punktlari, madaniyat va sport obyektlari, mahalla fuqarolar yig‘ini binolari, savdo va xizmat ko‘rsatish obyektlarini qurish va kapital ta’mirlash masalalari bosh rejalarda alohida aks ettiriladi. Shuningdek, ko‘p kvartirali uy-joylar va yakka tartibdagi uy-joylarni rekonstruksiya qilish, mavjud bino va inshootlarning seysmik holatini yaxshilash bo‘yicha takliflar ishlab chiqiladi. Bundan tashqari, hududlarda ishlab chiqarish, hunarmandchilik va xizmat ko‘rsatish yo‘nalishidagi kichik sanoat obyektlarini joylashtirish orqali yangi ish o‘rinlarini yaratish, tadbirkorlik subyektlari uchun zarur shart-sharoitlar yaratish hamda aholi, ayniqsa yoshlar va xotin-qizlar bandligini ta’minlashga qaratilgan loyihalarni amalga oshirish nazarda tutilmoqda. Mazkur kompleks yondashuv og‘ir toifadagi mahallalarning infratuzilmasini rivojlantirish, qurilish va obodonlashtirish ishlarini tizimli ravishda amalga oshirish, aholining turmush darajasini oshirish, kambag‘allikni qisqartirish hamda hududlarning barqaror ijtimoiy-iqtisodiy rivojlanishini ta’minlashga xizmat qiladi.





