O‘zbekiston Respublikasi Oliy taʼlim, fan va innovatsiyalar vazirligi

lmiy faoliyat sohasidagi tashkilotlarni laboratoriya asbob-uskunalari, sarflov materiallari va butlovchi qismlar bilan ta’minlash tartibi to‘g‘risidagi nizomni tasdiqlash haqida

O‘zbekiston Respublikasi Prezidentining “O‘zbekiston – 2030” strategiyasini “Atrof-muhitni asrash va “yashil iqtisodiyot” yilida amalga oshirishga oid davlat dasturi to‘g‘risida” 2025-yil 30-yanvardagi PF-16-son Farmoniga muvofiq ilmiy tadqiqotlarning sifatini oshirish, ilmiy laboratoriyalarni zarur asbob-uskunalar, sarflov materiallari va butlovchi qismlar bilan ta’minlash tizimini yanada takomillashtirish maqsadida Vazirlar Mahkamasi qaror qiladi:

1. O‘zbekiston Respublikasi Prezidentining 2025-yil 30-yanvardagi PF-16-son Farmonida ilmiy laboratoriyalarni asbob-uskunalar bilan jihozlash tartibini takomillashtirishni nazarda tutuvchi normativ-huquqiy hujjat loyihasini ishlab chiqish belgilangan ma’lumot uchun qabul qilinsin.

2. Quyidagilarni nazarda tutuvchi Ilmiy faoliyat sohasidagi tashkilotlarni laboratoriya asbob-uskunalari, sarflov materiallari va butlovchi qismlar bilan ta’minlash tartibi to‘g‘risidagi nizom ilovaga muvofiq tasdiqlansin:

— ilmiy tadqiqotlar uchun zarur asbob-uskunalar, sarflov materiallari va butlovchi qismlarga bo‘lgan ehtiyojni o‘rganish tizimlashtirish;
— ilmiy faoliyatni amalga oshiruvchi tashkilotlarning buyurtmalari bo‘yicha xaridlarni mustaqil va markazlashgan holda amalga oshirish;
— ilmiy laboratoriyalar asbob-uskunalari bo‘yicha buyurtmalarni shakllantirish, taqdim etish, qabul qilish, ko‘rib chiqish va ularning hisobini yuritishni Ilmiy laboratoriya asbob-uskunalari yagona elektron platformasi orqali yo‘lga qo‘yish.

1. Oliy ta’lim, fan va innovatsiyalar vazirligi uch oy muddatda Ilmiy laboratoriya asbob-uskunalari yagona elektron platformasi (keyingi o‘rinlarda — maxsus axborot tizimi) ishlab chiqilishini ta’minlasin.

4. Belgilansinki:

maxsus axborot tizimini ishlab chiqish va texnik jihatdan qo‘llab-quvvatlash qonunchilik hujjatlarida belgilangan tartibda Ilm-fanni moliyalashtirish va innovatsiyalarni qo‘llab-quvvatlash jamg‘armasi mablag‘lari hisobidan amalga oshiriladi;

ilmiy faoliyatni amalga oshiruvchi tashkilotlarda xarid qilinadigan laboratoriya asbob-uskunasidan foydalanish bo‘yicha malakali xodimlar bo‘lmaganida yoki xodimlar malakasini oshirish zarurati bo‘lgan taqdirda, ularning ko‘nikmalarini oshirish uchun 40 ish kungacha bo‘lgan muddatga yetakchi xorijiy ilmiy tashkilotlarda ilmiy stajirovka o‘tkaziladi. Vazirlar Mahkamasining 2021-yil 19-apreldagi 222-son qarori bilan tasdiqlangan Yosh olimlarni yetakchi xorijiy ilmiy tashkilotlarda qisqa muddatli ilmiy stajirovkalarga yuborish tartibi to‘g‘risidagi nizomda belgilangan tartibga muvofiq boriladi.

5. Vazirlar Mahkamasining “Ilmiy laboratoriyalarni zamonaviy asbob-uskunalar bilan jihozlashni yanada takomillashtirish chora-tadbirlari to‘g‘risida” 2022-yil 27-sentabrdagi 525-son qarori o‘z kuchini yo‘qotgan deb hisoblansin.

6. Oliy ta’lim, fan va innovatsiyalar vazirligi manfaatdor vazirlik va idoralar bilan birgalikda o‘zlari qabul qilgan normativ-huquqiy hujjatlarni ikki oy muddatda ushbu qarorga muvofiqlashtirsin.

7. Ushbu qarorning bajarilishini nazorat qilish O‘zbekiston Respublikasi oliy ta’lim, fan va innovatsiyalar vaziri K.A. Sharipov zimmasiga yuklansin.

O‘zbekiston Respublikasining
Bosh vaziri A. Aripov

Vazirlar Mahkamasining
2026-yil 17-fevraldagi 65-son qaroriga
ilova

Ilmiy faoliyat sohasidagi tashkilotlarni laboratoriya asbob-uskunalari, sarflov materiallari va butlovchi qismlar bilan ta’minlash tartibi to‘g‘risida
NIZOM

1-bob. Umumiy qoidalar

1. Ushbu Nizom ilmiy faoliyat sohasidagi tashkilotlarda (keyingi o‘rinlarda — tashkilot) bajariladigan ilmiy-tadqiqot uchun zarur bo‘lgan asbob-uskunalarni xarid qilish hamda sarflov materiallari va butlovchi qismlar bilan ta’minlash tartibini belgilaydi.

2. Ushbu Nizomda quyidagi asosiy tushunchalar qo‘llanadi:

asbob-uskunalar bilan jihozlash — tashkilotning ilmiy bo‘linmasiga xarid qilingan asbob-uskunani o‘rnatish, jihozlash va qo‘shimcha jihozlash bilan bog‘liq ta’minot ishlarini amalga oshirish;

davlat ilmiy dasturlari — davlat buyurtmasi asosida bajariladigan fundamental yoki amaliy tadqiqot loyihalarini o‘z ichiga olgan va ilmiy faoliyatga oid davlat dasturlari, davlat maqsadli dasturlari hamda hududiy dasturlar;

doktorlik dissertatsiyasi — tegishli ilmiy darajani olish maqsadida tayyorlangan va muayyan ilmiy muammoning yechimiga qaratilgan ilmiy-tadqiqot ishi;

ilmiy-tadqiqot — muayyan mavzu bo‘yicha olib borilishi rejalashtirilgan, kutilayotgan natijalar, kalendar-reja hamda ijrochilar to‘g‘risidagi ma’lumotlarni o‘z ichiga olgan, tashkilotning Ilmiy kengashi yoki unga teng vakolatga ega bo‘linmasi bilan kelishilgan tadqiqot;

ilmiy-tadqiqot dasturi — tashkilotning muayyan davr uchun bir mavzu (yo‘nalish)dagi ilmiy-tadqiqotlarni o‘z ichiga olgan va belgilangan tartibda yuqori turuvchi tashkilot tomonidan tasdiqlangan hujjat;

ilmiy-tadqiqotni moddiy jihatdan ta’minlash — bajariladigan ilmiy-tadqiqotlar uchun zarur bo‘lgan asbob-uskunalar bilan jihozlash, sarflov materiallari hamda butlovchi qismlarni xarid qilish va o‘rnatish;

ilmiy-tadqiqot rahbari — belgilangan muddat va ajratilgan moliyalashtirish doirasida ilmiy-tadqiqotning oldiga qo‘yilgan maqsadga erishishni rejalashtirish, tashkil etish, nazorat qilish va muvofiqlashtirish ishlariga mas’ul bo‘lgan shaxs;

 

markazlashgan davlat xaridi — ilmiy-tadqiqot rahbarining belgilangan tartibda taqdim etadigan arizasiga ko‘ra ilmiy-tadqiqotni moddiy jihatdan ta’minlash uchun bazaviy hisoblash miqdorining 500 baravari va undan yuqori bo‘lgan davlat xaridlari to‘g‘risidagi qonunchilik va boshqa qonunchilik hujjatlariga muvofiq amalga oshiriladigan xaridlar;

mustaqil ravishda xarid — ilmiy-tadqiqot rahbarining belgilangan tartibda taqdim etadigan arizasiga ko‘ra ilmiy-tadqiqotni moddiy jihatdan ta’minlash uchun ilmiy-tadqiqotni bajaradigan tashkilot tomonidan bazaviy hisoblash miqdorining 500 baravarigacha bo‘lgan davlat xaridlari to‘g‘risidagi qonunchilik va boshqa qonunchilik hujjatlariga muvofiq amalga oshiriladigan xaridlar;

maxsus axborot tizimi — ilmiy laboratoriya asbob-uskunalari bo‘yicha buyurtmalarni shakllantirish, taqdim etish, qabul qilish, ko‘rib chiqish va ularning hisobini yuritish imkonini beruvchi dasturiy ta’minot.

3. Ilmiy-tadqiqot Ilm-fanni moliyalashtirish va innovatsiyalarni qo‘llab-quvvatlash jamg‘armasi (keyingi o‘rinlarda — Jamg‘arma) mablag‘lari va qonunchilik hujjatlarida taqiqlanmagan boshqa manbalar hisobidan moddiy jihatdan ta’minlanadi.

4. Ilmiy faoliyatni tashkilotlar tomonidan xaridga mo‘ljallangan buyurtmalar Jamg‘arma kuzatuv kengashiga tasdiqlash uchun kiritiladi (davlat ilmiy dasturlari doirasida bajariladigan fundamental va amaliy tadqiqotlar bundan mustasno).

5. Jamg‘arma mablag‘lari hisobidan ilmiy-tadqiqotni moddiy jihatdan ta’minlash bilan bog‘liq xarid (keyingi o‘rinlarda — xarid) ikki xil usulda (markazlashgan davlat xaridi yoki mustaqil ravishda xarid) Jamg‘arma tomonidan faoliyat yo‘nalishlari doirasida amalga oshiriladi.

davlat ilmiy dasturlari doirasida bajariladigan fundamental va amaliy tadqiqotlar (keyingi o‘rinlarda — ilmiy loyiha);

Davlat byudjeti mablag‘lari hisobidan saqlanayotgan ilmiy bo‘linmalar (laboratoriya) yuqori turuvchi tashkilot tomonidan tasdiqlangan ilmiy-tadqiqot dasturi doirasida muayyan mavzulardagi (keyingi o‘rinlarda — ilmiy tadqiqotlar);

ikki va undan ortiq bo‘lgan doktorantlarning dissertatsiyalari bo‘yicha tadqiqotlar (keyingi o‘rinlarda — dissertatsiya tadqiqoti).

6. Quyidagi mas’ullar tomonidan xarid uchun ariza amalga oshiriladi:

ilmiy loyihada — loyiha rahbari;
ilmiy mavzuda — ilmiy bo‘linma rahbari yoki ilmiy-tadqiqot dasturida tegishli ilmiy mavzuga rahbarlik qiluvchi ilmiy xodim;
dissertatsiya tadqiqotida — doktorantlarning ilmiy rahbari yoki o‘zaro kelishilgan holda ilmiy daraja va unvonga ega bo‘lgan doktorantlar biri.

7. Xaridlar bo‘yicha arizalarni qabul qilish, ularni ko‘rib chiqish, moliyalashtirish, foydalanish va hisobotini yuritish ushbu Nizomga 1-ilovadagi sxema muvofiq amalga oshiriladi.

2-bob. Xaridlar bo‘yicha arizalarni qabul qilish va ko‘rib chiqish

8. Arizada ilmiy faoliyat yo‘nalishlarini ko‘rsatgan holda markazlashgan davlat xaridi yoki mustaqil ravishda xarid usullaridan birini amalga oshirish ko‘rsatiladi.

9. Ariza, maxsus axborot tizimida ma’lum bir ilmiy faoliyat yo‘nalishidagi tadqiqotni bajarishga mas’ul tashkilot rahbari tomonidan kelishilgan holda yuboriladi.

10. Xaridlar bo‘yicha arizalar ilmiy-tadqiqot rahbari tomonidan O‘zbekiston Respublikasi Oliy ta’lim, fan va innovatsiyalar vazirligi huzuridagi Innovatsion rivojlanish agentligining (keyingi o‘rinlarda — Agentlik) maxsus axborot tizimi orqali yuboriladi. Shuningdek, O‘zbekiston Respublikasi Yagona interaktiv davlat xizmatlari portalida (keyingi o‘rinlarda — YAIDXP) maxsus kabinet orqali ariza yuborish imkoniyati yaratiladi.

YAIDXP orqali ilmiy-tadqiqotlar uchun zarur asbob-uskunalar bilan jihozlash (qo‘shimcha jihozlash), sarflov materiallari va butlovchi qismlar bilan ta’minlash davlat xizmatini ko‘rsatish bo‘yicha ham ariza yuborish imkoniyati yaratiladi.

Bunda, arizalar YAIDXP orqali yuborilganda, ariza uning mas’ul tashkilot rahbari bilan kelishilganini tasdiqlovchi hujjat biriktiriladi.

11. YAIDXP orqali ariza yuborilganda, ushbu Nizomga 2-ilovada keltirilgan namunadagi so‘rovnoma elektron ravishda to‘ldiriladi.
So‘rovnoma elektron raqamli imzo bilan tasdiqlanishi talab etilmaydi.

12. Markazlashgan davlat xaridi uchun arizaga maxsus axborot tizimi orqali quyidagi hujjatlar ilova qilinadi:

• tashkilotning kollegial organi tomonidan (kollegial organ mavjud bo‘lmagan taqdirda tashkilot xodimlarining kengaytirilgan yig‘ilishida) xaridni amalga oshirish bo‘yicha qabul qilingan qarordan ko‘chirma;

• ushbu Nizomga 3, 4, 5-ilovalarga muvofiq shakldagi ruxsat;

• har bir xarid bo‘yicha alohida ishlab chiqilgan texnik topshiriq;

• xarid bo‘yicha olingan kamida ikkita dastlabki tijorat takliflari;

• dastlabki tijorat takliflari asosida tuzilgan xarid reja-grafigi;

• fan yo‘nalishlari bo‘yicha ilmiy-texnik kengash bayonnomasi (davlat ilmiy dasturlarida ilmiy loyihalar bo‘yicha xaridlar uchun);

• tashkilotda xarid uchun mas’ul ishchi guruh tarkibi to‘g‘risida ma’lumot.

13. Agentlik qabul qilingan arizalar bo‘yicha shakllantirilgan buyurtmalarni 10 ish kuni ichida ushbu Nizomda belgilangan talablarga muvofiqligini, shuningdek, arizaga ilova qilingan hujjatlar to‘g‘ri va to‘liq rasmiylashtirilganligini ko‘rib chiqish va ko‘rib chiqish natijalari bo‘yicha mas’ullangan arizalarni maxsus axborot tizimi orqali Xarid komissiyasiga yuboradi.

14. Ko‘rib chiqish jarayonida ushbu Nizom talablariga muvofiq rasmiylashtirilmagan arizalar Agentlik tomonidan maxsus axborot tizimi orqali qayta ishlash uchun ilmiy-tadqiqot rahbariga yuboriladi.

15. Taqdim etilgan ariza quyidagi hollarda Agentlik tomonidan rad etiladi:

• ariza va unga ilova qilingan hujjatlar to‘liq va to‘g‘ri rasmiylashtirilmaganda, jumladan, zarur imzo, muhr va shtamplar mavjud bo‘lmaganda;

• ushbu Nizomning 12-bandida talab etilgan hujjatlar to‘liq ilova qilinmaganda;

• ariza ushbu Nizomning 21, 25 va 29-bandlarida belgilangan muddatlarda taqdim etilmaganda;

• yolg‘on yoki soxta hujjatlar taqdim etilganda.

16. Rad etilgan arizadagi kamchiliklar bartaraf etilgandan so‘ng ariza belgilangan muddatlarda qayta topshirilishi mumkin.

17. Kollegial organning qaroridan ko‘chirma arizani kelishish mobaynida tashkilot rahbari belgilagan xodim tomonidan maxsus axborot tizimiga yuklanadi.

18. Ilmiy-tadqiqotlarni ekspertizadan o‘tkazgan tegishli ilmiy kengash arizada ko‘rsatilgan xaridni ko‘rib chiqish va muhokama qilganligi ma’lum qiladi.
Ko‘rib chiqish va muhokama qilish natijalari Ilmiy kengashning bayonnomasida, bayonnoma dalolatnomasida qayd etiladi va xarid bo‘yicha qaror belgilangan tartibda rasmiylashtiriladi.

19. Xarid bo‘yicha texnik topshiriq va dastlabki tijorat takliflari ilmiy-tadqiqot bo‘yicha hujjatlarda nazarda tutilgan asbob-uskunalarga muvofiq ishlab chiqiladi.

20. Tashkilotlarda xarid bo‘yicha mas’ul ishchi guruh tarkibi xarid qilinadigan asbob-uskunalarni o‘rnatish, sarflov materiallari va butlovchi qismlar bilan ta’minlashga mas’ul mutaxassislardan iborat bo‘ladi.

 

 1-§. Davlat ilmiy dasturlaridagi ilmiy loyihalar bo‘yicha xaridlar uchun ariza va hujjatlarni shakllantirishga oid talablar

21. Ilmiy loyiha uchun xaridlar bo‘yicha ariza ilmiy loyiha boshlanganidan so‘ng loyihani bajarish muddatining oxirgi yili uchinchi oygacha qabul qilinadi.

22. Ilmiy loyiha uchun asbob-uskunalar, sarflov materiallari va butlovchi qismlar bo‘yicha xaridlar umumlashtirilgan holda ikki alohida taqdim etilgan arizalar bo‘yicha amalga oshiriladi.

Arizada ko‘rsatilgan asbob-uskunalar, sarflov materiallari va butlovchi qismlar xaridi ilmiy loyiha hujjatlarida nazarda tutilgan bo‘lishi hamda ilmiy loyihaning ekspertizadan o‘tkazgan tegishli Ilmiy-texnik kengashining yig‘ilish bayonnomasida alohida masala sifatida ko‘rib chiqilib, ijobiy xulosa bilan tasdiqlanishi shart.

23. Arizani maxsus axborot tizimiga kiritishda ilmiy loyihaning shifri ko‘rsatiladi va ushbu Nizomning 12-bandida nazarda tutilgan ma’lumotlar arizaga ilova qilingan hujjat sifatida biriktiriladi.

24. Xarid jarayonlari boshlanmagan arizalar bo‘yicha, zaruratga ko‘ra, Ilmiy-texnik kengashining ijobiy xulosasi asosida ilmiy loyihaning umumiy moliyalashtirish hajmi doirasida o‘zgartirish yoki qo‘shimchalar asosida ariza maxsus axborot tizimi orqali Agentlikka yuboriladi.

 

2-§. Ilmiy-tadqiqot dasturlari ilmiy mavzusi bo‘yicha xarid uchun ariza va hujjatlarni shakllantirishga oid talablar

25. Ilmiy mavzu bo‘yicha xarid uchun ariza Davlat byudjeti mablag‘lari hisobidan saqlanadigan ilmiy bo‘linmaning (laboratoriya) yuqori turuvchi tashkiloti tomonidan tasdiqlangan ilmiy-tadqiqot dasturi bajarilishining birinchi yili kuniga qadar qabul qilinadi.

Ariza ilmiy mavzuga rahbarlik qiluvchi shaxs tomonidan maxsus axborot tizimi orqali taqdim etiladi.

26. Arizada ko‘rsatilgan asbob-uskunalar, sarflov materiallari va butlovchi qismlar ilmiy-tadqiqot dasturining ishlash istiqboli va ilmiy mazmuni bo‘yicha xarid masalasi tashkilot kollegial organining yig‘ilishida alohida masala sifatida ko‘rib chiqilib, ijobiy xulosa bilan tasdiqlangan bayonnomada albatta ko‘rsatilishi lozim.

27. Arizani maxsus axborot tizimiga kiritishda ilmiy mavzuga doir ma’lumotlar ko‘rsatiladi va ushbu Nizomning 12-bandida nazarda tutilgan ma’lumotlar arizaga ilova qilingan hujjat sifatida biriktiriladi.

28. Xarid jarayonlari boshlanmagan arizalar bo‘yicha, zaruratga ko‘ra, tashkilot kollegial organining ijobiy xulosasi asosida ilmiy mavzuning umumiy moliyalashtirish hajmi doirasida o‘zgartirish yoki qo‘shimchalar asosida ariza maxsus axborot tizimi orqali Agentlikka yuboriladi.

3-§. Doktorlik dissertatsiyasi tadqiqoti bo‘yicha xarid uchun ariza va hujjatlarni shakllantirishga oid talablar

29. Dissertatsiya tadqiqoti bo‘yicha xarid uchun arizalar bir tashkilotdagi doktorantura o‘qishga qabul qilingan sanadan boshlab, ikkinchi yilning 30 iyun sanasiga qadar qilinadi.

Arizalar doktorantlarning ilmiy rahbari yoki o‘zaro kelishilgan holda ilmiy daraja va unvonga ega bo‘lgan doktorantlarning biri tomonidan maxsus axborot tizimi orqali taqdim etiladi.

30. Arizani maxsus axborot tizimiga kiritishda dissertatsiya tadqiqotlariga doir ma’lumotlar ko‘rsatiladi va ushbu Nizomning 12-bandida nazarda tutilgan ma’lumotlar arizaga ilova qilingan hujjat sifatida biriktiriladi.

31. Arizada ikkita va undan ortiq dissertatsiya tadqiqotini tayyorlashda bir xil turdagi asbob-uskunalar, sarflov materiallari va butlovchi qismlardan foydalanish zarurati asoslanadi.

32. Dissertatsiya tadqiqoti bo‘yicha xarid masalasi tashkilotning kollegial organining yig‘ilishida alohida masala sifatida ko‘rib chiqiladi va muhokama natijalari bo‘yicha tasdiqlangan bayonnomada batafsil ko‘rsatilishi shart.
Ariza kollegial organining xarid bo‘yicha ijobiy qarori bo‘lgan taqdirdagina qabul qilinadi.

33. Xarid jarayonlari boshlanmagan arizalar bo‘yicha, zaruratga ko‘ra, tashkilot kollegial organining ijobiy xulosasi asosida dissertatsiya tadqiqoti uchun zarur bo‘lgan xaridlarning belgilangan umumiy summasi doirasida o‘zgartirish yoki qo‘shimchalar asosida ariza maxsus axborot tizimi orqali Agentlikka yuboriladi.

 

3-bob. Markazlashgan davlat xaridini amalga oshirish

34. Jamg‘arma markazlashgan davlat xaridlarini amalga oshiruvchi markazlashgan xarid organi hisoblanadi.
Jamg‘arma tomonidan xarid qilinadigan asbob-uskunalar, sarflov materiallari va butlovchi qismlarning ro‘yxati davlat xaridlarining maxsus axborot portaliga joylashtiriladi.

35. Markazlashgan davlat xaridlarini amalga oshirish uchun Jamg‘arma tomonidan har yil yanvar oyida ilmiy faoliyat yo‘nalishlari uchun zarur asbob-uskunalar, sarflov materiallari va butlovchi qismlar xarid qilish bo‘yicha komissiya (keyingi o‘rinlarda — Xarid komissiyasi) tashkil etiladi.

36. Xarid komissiyasi Jamg‘arma ijrochi direktorining buyrug‘i asosida kamida 7 nafar tok sonli a’zolardan iborat tarkibda tuziladi.

Xarid komissiyasi tarkibiga mutaxassisligi bo‘yicha kamida besh yil mehnat stajiga ega bo‘lgan vazirliklar, idoralar hamda ilmiy faoliyatni olib boruvchi tashkilotlardan xaridlarning texnik parametrlarini yuqori darajada biladigan malakali mutaxassislar kiritiladi.

37. Xarid komissiyasi komissiya raisi, uning o‘rinbosari, mas’ul kotib (ovoz berish huquqiga ega emas) va boshqa a’zolardan iborat bo‘ladi.
Zarur hollarda, Xarid komissiyasi ishiga qo‘shimcha a’zo jumladan, xorijiy mutaxassislar ekspert sifatida (ovoz berish huquqisiz) jalb qilinadi.

38. Xarid komissiyasining ish faoliyatini mas’ul kotib tashkil qiladi.

39. Xarid komissiyasi a’zolari xolis bo‘lishi va xarid qilish tartib-taomili g‘olibini tanlashdan shaxsiy manfaatdor bo‘lmasligi zarur.

40. Xarid komissiyasining yig‘ilishlari komissiya a’zolari ishtirokida yozma-og‘zaki o‘tkaziladi. Ovozma-og‘zaki yig‘ilishlar, zaruratga ko‘ra, videokonferensiyalar, telefon orqali ham o‘tkaziladi.

41. Xarid komissiyasining yig‘ilishi uning a’zolaridan uchdan ikki qismi ishtirok etganda vakolatli hisoblanadi.

42. Xarid komissiyasining qarori uning a’zolari umumiy sonining ko‘pchilik ovozi bilan qabul qilinadi.
Ovozlar teng bo‘lgan taqdirda, Xarid komissiyasiga raislik qiluvchining ovozi hal qiluvchi hisoblanadi. Xarid komissiyasi raisi va a’zolari ovoz berishda betaraf qolish huquqiga ega emaslar.
Xarid komissiyasi raisi bo‘lmagan vaqtda uning vazifalari komissiya raisi o‘rinbosari tomonidan amalga oshiriladi.

43. Xarid komissiyasining kelib tushgan takliflarni baholash bo‘yicha qarorlari davlat xaridlarining maxsus axborot portalida tuzilgan bayonnomalar bilan rasmiylashtiriladi.
Xarid komissiyasining bayoni mas’ul kotib tomonidan tuziladi va Xarid komissiyasi yig‘ilishida ishtirok etgan barcha a’zolari bilan kelishilgan holda rais tomonidan tasdiqlanadi.

44. Xarid komissiyasining har bir a’zosi yil yakuni bo‘yicha Jamg‘arma mablag‘lari hisobidan bazaviy hisoblash miqdorining 50 baravari miqdorida bir martalik mukofot puli (barcha soliqlar ushlab qolingan holda) beriladi.
Mukofot puli Jamg‘arma ijro etuvchi direktorining buyrug‘i asosida beriladi (tayinlanadi).

45. Mas’ul kotib davlat xaridlari to‘g‘risidagi e’lonni davlat xaridlarining elektron tizimiga joylashtiradi.

46. Markazlashgan davlat xaridlari eng yaxshi takliflarni tanlash asosida amalga oshiriladi.

Bunda laboratoriya asbob-uskunalari, zarur sarflov materiallari va butlovchi qismlar qiymati bazaviy hisoblash miqdorining olti ming baravari miqdoridan oshgan hollarda, davlat xaridi doir texnik topshiriqlar qonunchilik hujjatlarida belgilangan tartibda ekspertiza uchun O‘zbekiston Respublikasi Iqtisodiyot va moliya vazirligi huzuridagi “Loyihalar va import kontraktlarini kompleks ekspertiza qilish markazi” davlat unitar korxonasiga kiritiladi.

47. Yetkazib beruvchilar va ishlab chiqaruvchilar bilan qonunchilik hujjatlarida belgilangan tartibda raqobatli xarid qilish tartib-taomillariga muvofiq buyurtmalarni etkazib berish (xizmatlar ko‘rsatish), zarurat bo‘lganda, buyurtmalarni tashkilotlarga etkazib berish, o‘rnatish va ishga tushirish hamda foydalanishga berilgan holda ishlarni amalga oshirish uchun elektron shartnomalar tuziladi (xorijiy etkazib beruvchilar bundan mustasno).

Tuziladigan shartnoma quyidagilar tomonidan imzolanadi:
Agentlik – “Buyurtmachi”;
Jamg‘arma – “Markazlashgan xarid organi”;
ishlab chiqaruvchi yoki etkazib beruvchi – “Etkazib beruvchi”;
tashkilot – “Qabul qiluvchi”.

48. Jamg‘arma etkazib beruvchilar bilan o‘zaro hisob-kitoblarni tuzilgan shartnomaga muvofiq milliy yoki xorijiy valyuta birligida pul o‘tkazish yoki akkreditiv shaklida moliyalashtiradi.

49. Xarid bo‘yicha shartnoma majburiyatlari bajarilgandan so‘ng tovar etkazib berilganini tasdiqlovchi tegishli hujjatlar (tashkilot va etkazib beruvchi o‘rtasida imzolangan topshirish-qabul qilish dalolatnomasi, uskunani foydalanishga topshirish dalolatnomasi, foto-lavhalar va boshqalar) qabul qiluvchi tomonidan bir oyda muddatda maxsus axborot tizimiga yuklanadi.

4-bob. Mustaqil ravishda xaridni amalga oshirish

50. Mustaqil ravishda xarid maxsus axborot tizimi orqali yuborilgan arizaga asosan tashkilot tomonidan amalga oshiriladi.

51. Mustaqil ravishda xaridni amalga oshirish uchun Jamg‘arma tomonidan O‘zbekiston Respublikasi Iqtisodiyot va moliya vazirligi huzuridagi G‘aznachilik xizmati qo‘mitasida tashkilotga alohida byudjetdan tashqari shaxsiy g‘azna hisobvarag‘i ochiladi.

52. Ariza Agentlik tomonidan ko‘rib chiqilib, ma’qullangandan so‘ng Agentlikning ruxsatnomasiga asosan Jamg‘arma mablag‘lari tashkilotning tegishli byudjetdan tashqari shaxsiy g‘azna hisobvarag‘iga o‘tkazib beriladi.

53. Tashkilotlar xaridlarini tashkil etish va o‘tkazkan usullari bilan belgilangan xodim O‘zbekiston Respublikasining “Davlat xaridlari to‘g‘risida”gi Qonuniga muvofiq davlat xaridlari elektron tizimida davlat xaridlari to‘g‘risidagi e’lonni joylashtiradi va lot raqamni ilmiy-tadqiqot rahbariga taqdim etadi.

54. Ilmiy-tadqiqot rahbari e’lon joylashtirilgandan so‘ng bir hafta muddatda maxsus axborot tizimiga lot raqamini kiritadi.

55. Tashkilot va etkazib beruvchi o‘rtasida shartnoma tuzilgandan so‘ng bir hafta muddatda ilmiy-tadqiqot rahbari tomonidan shartnomaning nusxasi maxsus axborot tizimiga yuklanadi.

56. Mustaqil xarid yakunlari bo‘yicha sarflanmagan (ikki majburiyat bir vaqtning o‘zida bajarilmagan, iqtisod qilingan) mablag‘lar shartnomaviy majburiyatlar bajarilgandan so‘ng bir oy muddatda Jamg‘armaga qaytariladi.
Tashkilot rahbari sarflanmagan mablag‘larni Jamg‘armaga belgilangan muddatda va to‘liq o‘tkazilishiga javobgar hisoblanadi.

5-bob. Xarid qilingan buyurtmalardan foydalanish tartibi

57. Tashkilot xarid qilingan buyurtmalar etkazib berilgan kundan boshlab olti ish davomida har ikki yakunida buyurtmaning ilmiy, iqtisodiy samaradorligi va kutilayotgan natijalarga erishilgani asosida maxsus axborot tizimi orqali Xarid komissiyasiga hisobot taqdim etib boradi.

58. Hisobotda quyidagilar aks ettirilishi lozim:

• buyurtmaning to‘liq va funksional ishlashi uchun yaratilgan shart-sharoitlar;

• buyurtmadan bevosita foydalanuvchilar soni, shu jumladan, bevosita 40 nafargacha bo‘lgan foydalanuvchi yoshlar soni;

• buyurtmadan bilvosita foydalanuvchilar soni, shu jumladan, bilvosita 40 nafargacha bo‘lgan foydalanuvchi yoshlar soni;

• buyurtmadan foydalanish hududi (laboratoriya, oliy ta’lim tashkiloti yoki ilmiy tashkilot o‘quv respublika miqyosida (tegishli faktlar asosida);

• hisobot yilida buyurtma yordamida olingan ilmiy natijalar va ularning joriy etilishi to‘g‘risida ma’lumot.

59. Xarid komissiyasi tomonidan buyurtmaning ilmiy, iqtisodiy samaradorligi va kutilayotgan natijalarga erishilgani yuzasidan xulosasi hisobot kelib tushgan sanadan boshlab bir oy davomida tayyorlanadi va Agentlikka taqdim etiladi.

Zaruratga ko‘ra, Xarid komissiyasi xarid qilingan va o‘rnatilgan laboratoriya asbob-uskunalari, sarflov materiallari va butlovchi qismlar bo‘yicha hisobotni ilmiy kengash xulosasini o‘rganish huquqiga ega.

60. Agentlik tomonidan xulosa kelib tushgan kundan boshlab o‘n ish kuni ichida buyurtmalardan foydalanish natijalari maqsadga muvofiqligi yuzasidan qaror qabul qilinadi.
Buyurtmadan foydalanish natijalari ushbu Nizom talablariga muvofiq emas deb topilganda, buyurtmadan foydalanish natijalari ko‘rib chiqish tashkilotga ogohlantirish beriladi hamda bu haqda yuqori turuvchi organga taqdimnoma kiritiladi.
Taqdimnomada ko‘rsatilgan kamchiliklar keyingi hisobot davriga qadar bartaraf etilmagan taqdirda, uch yil muddatga tashkilotning buyurtmalari qabul qilinmaydi.

61. Tashkilot rahbari buyurtmalardan maqsadli va samarali foydalanish uchun shaxsan javobgar hisoblanadi.

6-bob. Yakunlovchi qoidalar

62. Ushbu Nizomda belgilangan tartibda ariza beruvchilar qabul qilgan qarorlar bo‘yicha qonunchilik hujjatlarida belgilangan tartibda shikoyat qilish huquqiga ega.

63. Ushbu Nizom talablari buzilishida aybdor bo‘lgan shaxslar qonunchilik hujjatlariga muvofiq javobgar bo‘ladilar.