“Ogʻir” mahallalar uchun master rejalar: talabalar amaliyotga jalb etiladi va treninglar tashkil etiladi
2026-02-17 21:45:00 / Vazirlik yangiliklari
Oliy taʼlim, fan va innovatsiyalar vaziri oʻrinbosari Oʻktam Salomov 17-fevral kuni Jahon banki vakillari bilan uchrashdi. Uchrashuvda vazirlik mutasaddilari, Toshkent arxitektura-qurilish universiteti mutaxassislari, Iqtisodiyot va moliya vazirligi hamda Jahon banki vakillari ishtirok etdilar.
Uchrashuvda “ogʻir” mahallalarni kompleks rivojlantirishga qaratilgan master rejalarni ishlab chiqish jarayoniga oliy taʼlim tashkilotlari talabalarini jalb etish, ular oʻrtasida respublika miqyosida tanlov tashkil etish hamda maxsus oʻquv-amaliy treninglar oʻtkazish masalalari muhokama qilindi.
Muzokaralarda mazkur tanlovni 2026-yil iyun oyi atrofida boshlash, tanlov doirasida 50–60 ta talabalar guruhini shakllantirish va ular uchun maxsus oʻquv dasturlari asosida treninglar tashkil etish rejalashtirilayotgani qayd etildi. Treninglarda mamlakatning barcha hududlaridan 380–420 nafar talabaning ishtirok etishi koʻzda tutilmoqda.
Uchrashuv davomida Jahon banki tomonidan xalqaro tajribaga asoslangan metodik qoʻllanmalar, ekspertlik maslahatlari hamda texnik koʻmak taqdim etish masalalari ham muhokama qilindi.
Tomonlar ishtirokchi talabalar uchun 2026-yil iyun–sentyabr oylari davomida yozgi amaliyot dasturini yoʻlga qoʻyish, jarayonga professor-oʻqituvchilarni keng jalb etish, mahalliy va xorijiy ekspertlar ishtirokida uch oylik treninglar tashkil etish hamda loyihani bosqichma-bosqich amalga oshirish boʻyicha hamkorlikni davom ettirishga kelishib oldilar.