Oʻzbekiston Yevropa Ittifoqi bilan “Horizon Europe” doirasida ilmiy hamkorlikni kengaytirmoqda
2026-02-12 12:05:00 / Vazirlik yangiliklari
Anjuman “Horizon Europe” boʻyicha Oʻzbekiston milliy aloqa koordinatori tashabbusi bilan Yevropa Komissiyasining Global Service Facility tuzilmasi hamda Yevropa Ittifoqining Oʻzbekistondagi Delegatsiyasi koʻmagida tashkil etildi. Tadbir Toshkent davlat texnika universitetida oʻtkazilib, unda mamlakatning turli hududlaridan 100 dan ortiq olim va tadqiqotchilar, oliy taʼlim muassasalari vakillari, sanoat sohasi mutaxassislari hamda siyosatchilar ishtirok etdi.
Anjumanning birinchi sessiyasi “Horizon Europe” dasturining 2026–2027-yillarga moʻljallangan ish dasturlariga bagʻishlanib, moliyalashtirish ustuvor yoʻnalishlari, tematik klasterlar va xalqaro hamkorlik mexanizmlari yuzasidan taqdimotlar oʻtkazildi. Tadbirda taʼkidlanganidek, mazkur dasturda ishtirok etish nafaqat moliyaviy imkoniyatlar, balki Yevropa tadqiqotlar hududiga integratsiyalashuv yoʻlidagi muhim strategik qadam hisoblanadi.
Uchrashuvda Yevropa Ittifoqining Oʻzbekistondagi Delegatsiyasi vakillari, Erasmus+ milliy ofisi mutaxassislari hamda sohaviy milliy koordinatorlar ishtirok etdi. Yevropa Ittifoqi vakillari xalqaro hamkorlikning inklyuziv tamoyillarini taʼkidlab, Oʻzbekiston va Markaziy Osiyo mamlakatlari tadqiqotchilari “Horizon Europe” loyihalarida ishtirok etish va moliyalashtirish olish imkoniyatiga ega ekanini qayd etdilar.
Tadbir doirasida muvaffaqiyatli xalqaro loyihalar tajribasi ham taqdim etildi. Unda Oʻzbekiston ilmiy muassasalarining xalqaro konsorsiumlarda ishtirok etish faolligi ortib borayotgani alohida taʼkidlandi.
Ikki kunlik anjuman Oʻzbekiston va Yevropa Ittifoqi oʻrtasida innovatsiyaga asoslangan oʻsish, oʻzaro ishonch va manfaatlar uygʻunligi tamoyillariga asoslangan uzoq muddatli ilmiy hamkorlikni mustahkamlashga qaratilgan umumiy yondashuv mavjudligini namoyon etmoqda. “Horizon Europe” dasturida ishtirok etish orqali ilmiy salohiyatni oshirish, xalqaro ilmiy tarmoqlarni kengaytirish, texnologiyalar transferi va tijoratlashtirishni qoʻllab-quvvatlash, yosh tadqiqotchilarni ragʻbatlantirish hamda barqaror rivojlanish maqsadlariga erishish koʻzda tutilgan.
Oliy taʼlim, fan va innovatsiyalar vazirligi tadqiqotchilar, oliy taʼlim muassasalari va kompaniyalarni xalqaro moliyalashtirish imkoniyatlaridan samarali foydalanishga koʻmaklashishni hamda global ilmiy hamkorlikni kengaytirishni izchil davom ettiradi.
Tadbirda mamlakat boʻylab 100 dan ortiq olim va tadqiqotchilarning faol ishtiroki Oʻzbekistonning xalqaro ilmiy platformalarda faol qatnashish va global ilmiy taraqqiyotga munosib hissa qoʻshishga qaratilgan qatʼiy pozitsiyasini yana bir bor tasdiqladi.