O‘zbekiston Respublikasi Oliy taʼlim, fan va innovatsiyalar vazirligi

Oliy ta’lim, fan va innovatsiyalar vazirining birinchi o‘rinbosari Sardor Rajabov rahbarligida o‘tkazilgan yig‘ilishda viloyatdagi barcha oliy ta’lim muassasalari rektorlari, ularning birinchi prorektorlari hamda hududdagi texnikumlar rahbarlari ishtirok etdi.

Ishchi guruh tomonidan taqdim etilgan ma’lumotlar asosida talaba va o‘quvchilar o‘rtasida sodir etilgan jinoyatlar va huquqbuzarliklar tanqidiy ko‘rib chiqildi. Mavjud kamchiliklar ochiq muhokama qilinib, ayrim OTM va texnikumlarda profilaktik ishlarni kuchaytirish zarurligi alohida ta’kidlandi.

Ichki ishlar organlari ma’lumotlariga ko‘ra, 2025-yilda viloyat bo‘yicha 39 nafar talabalar tomonidan jinoyatlar sodir etilgan. Bu ko‘rsatkich o‘tgan yilning shu davriga nisbatan 9,4 foizga kamaygan bo‘lsa-da, ayrim ta’lim muassasalarida o‘sish holatlari qayd etilgan.

Sodir etilgan jinoyatlar tahliliga ko‘ra, 2 tasi tan jarohati yetkazish, 2 tasi bezorilik, 3 tasi tovlamachilik, 6 tasi o‘g‘irlik, 6 tasi yo‘l-transport hodisasi, 8 tasi firibgarlik hamda qolganlari boshqa turdagi jinoyatlardan iborat.

Hozirda viloyatdagi oliy ta’lim muassasalarida talabalar o‘rtasida jinoyatchilik va huquqbuzarliklarning oldini olish maqsadida 9 nafar profilaktika inspektori faoliyat yuritmoqda. Shuningdek, ta’lim muassasalarida “Qalqon” jamoatchilik guruhlari tashkil etilgan.

“Oliy ta’lim – ota-ona – mahalla” uzluksiz hamkorlik tizimini shakllantirish maqsadida o‘quv binolaridagi barcha auditoriyalarda videokuzatuv kameralari o‘rnatilib, talabalarning dars mashg‘ulotlarida muntazam qatnashishi nazoratga olingani qayd etildi.
Bugungi kunda viloyatdagi 47 ta texnikumda 28 464 nafar o‘quvchi tahsil olmoqda. 2024-yilda kasbiy ta’lim muassasalari o‘quvchilaridan 34 nafari jinoyat sodir etgan bo‘lsa, 2025-yilda bu ko‘rsatkich 27 nafarga kamaygan.

Tahlil natijalariga ko‘ra, jinoyatlar 8 ta o‘g‘irlik, 15 ta tan jarohati yetkazish, 2 ta firibgarlik va 2 ta bezorilik holatlaridan iborat ekani ma’lum qilindi.

Yig‘ilishda 2025/2026-o‘quv yilida o‘quvchilar o‘rtasida ma’naviy-tarbiyaviy, profilaktik hamda pedagogik-psixologik ishlar yetarli darajada tashkil etilmagani tanqid ostiga olindi. Shu sababli sodir etilgan huquqbuzarliklar uchun ayrim texnikum rahbarlari, ularning o‘rinbosarlari hamda tegishli guruh rahbarlariga nisbatan intizomiy choralar qo‘llanildi.

Yig‘ilish davomida yoshlar o‘rtasida jinoyatchilikning oldini olish, ma’naviy-ma’rifiy va profilaktik ishlarni tizimli tashkil etish, ota-onalar hamda mahalla bilan hamkorlikni kuchaytirish yuzasidan qator takliflar bildirildi.

Yakunida yoshlar o‘rtasida jinoyatchilikning oldini olish, mas’uliyatni oshirish va xavfsiz ta’lim muhitini yaratish bo‘yicha aniq vazifalar belgilab berildi.