Talabalar sporti tizimini rivojlantirishga bag‘ishlangan konferensiya o‘tkazildi
2026-02-09 17:00:00 / Vazirlik yangiliklari
Talaba va o‘quvchilarning ijtimoiy faolligini oshirish markazida O‘zbekiston talabalar sporti assotsiatsiyasining navbatdan tashqari konferensiya yig‘ilishi bo‘lib o‘tdi.
Yig‘ilishda Assotsiatsiyaning yangi tahrirdagi Ustavi tasdiqlandi, Bosh kotib saylandi hamda xalqaro sport tashkilotlariga a’zolik masalalari muhokama qilindi. Shuningdek, oliy ta’lim muassasalaridagi sport klublari faoliyatini rivojlantirish bo‘yicha fikr almashildi va uzoq muddatli strategiyalar belgilab olindi.
Xususan, bundan buyon Assotsiatsiya oliy ta’lim muassasalari sport klublarini Butunjahon universitetlari sporti federatsiyasi (FISU) standartlariga moslashtirish, sport klublarida FISU dasturlarini joriy etish hamda ular orqali universitetlarning xalqaro miqyosdagi brendi, imidji va reytingini oshirishni o‘z oldiga asosiy maqsad qilib qo‘ydi.
Konferensiya yakunida umumiy ovoz berish natijalariga ko‘ra Muzaffar Pazilov O‘zbekiston talabalar sporti assotsiatsiyasi Bosh kotibi etib saylandi.