Qoraqalpoq davlat universiteti va Nukus davlat pedagogika institutida ta’lim sifati hamda infratuzilma holati o‘rganildi
2026-02-06 19:25:00 / Vazirlik yangiliklari

Dastlab, universitetning o‘quv laboratoriyalari, ilmiy-tadqiqot markazlari hamda talabalarga yaratilgan zamonaviy sharoitlar bilan yaqindan tanishildi. Universitet rektori B. Jollibekov oliygohda amalga oshirilayotgan islohotlar, ta’lim sifati va ilmiy salohiyatni oshirish borasida olib borilayotgan ishlar haqida ma’lumot berdi.
Sardor Rajabov universitetning Kimyo-texnologiya fakultetida faoliyat yuritayotgan o‘quv va ilmiy laboratoriyalarni ko‘zdan kechirdi. Talabalar va professor-o‘qituvchilar tomonidan olib borilayotgan amaliy hamda ilmiy-tadqiqot ishlari namoyish etildi. Zamonaviy asbob-uskunalar bilan jihozlangan laboratoriyalarda talabalarning nazariy bilimlarini amaliyot bilan uyg‘unlashtirish uchun yaratilgan sharoitlar alohida ta’kidlandi.
Shuningdek, shu kuni Sardor Rajabov Nukus davlat pedagogika institutida bo‘lib, talaba-yoshlar uchun yaratilgan sharoitlar bilan tanishdi. Institutda o‘quv binolari, zamonaviy auditoriyalar, axborot-resurs va AT-inkubatsiya markazlari hamda laboratoriyalar ko‘zdan kechirildi. Ta’lim jarayonini yanada takomillashtirish, yoshlar uchun qulay va zamonaviy muhitni shakllantirish borasida amalga oshirilayotgan ishlar yuqori baholandi.
Vazirning birinchi o‘rinbosari talabalar bilan muloqot qilib, ularning fikr-mulohazalari va tashabbuslarini tingladi. Muloqot jarayonida ta’lim sifatini ta’minlash, o‘quv jarayoni va ilmiy faoliyatni rivojlantirish, yoshlarni qo‘llab-quvvatlash masalalari yuzasidan fikr almashildi.
Yakunida oliy ta’lim muassasalarining mavjud salohiyatidan samarali foydalanish, yuqori malakali pedagog kadrlar tayyorlash, ilm-fan va innovatsiyalarni rivojlantirish hamda yoshlar uchun qo‘shimcha imkoniyatlar yaratish borasida mutasaddilarga tegishli tavsiyalar va topshiriqlar berildi.






