Jizzax politexnika instituti Yevropa standartlari sari: Obuda universiteti bilan strategik hamkorlik yo‘lga qo‘yilmoqda
2026-01-30 10:00:00 / Vazirlik yangiliklari
2026-yil 27–29-yanvar kunlari institut rektori Alisher Usmonqulov boshchiligidagi delegatsiya Obuda universiteti rahbariyati bilan qator uchrashuvlar o‘tkazib, ta’lim, ilm-fan va boshqaruv sohalarida hamkorlikni kengaytirish masalalarini muhokama qildi.
Tashrif davomida Obuda universitetining axborot texnologiyalari, elektrotexnika, mexanika va xavfsizlik muhandisligi, arxitektura va qurilish, yengil sanoat va atrof-muhit muhandisligi, biznes va boshqaruv hamda Alba Regia texnika fakultetlari faoliyati bilan yaqindan tanishildi. Xususan, sun’iy intellekt laboratoriyalari, raqamli boshqaruv tizimlari va innovatsion ta’lim modellariga alohida e’tibor qaratildi.
Uchrashuvlarda tomonlar:
➖ qo‘shma ta’lim dasturlarini yo‘lga qo‘yish;
➖ professor-o‘qituvchilar va talabalar almashinuvini kengaytirish;
➖ xalqaro grant va stipendiya dasturlarida birgalikda ishtirok etish;
➖ ilmiy-tadqiqot, innovatsiya va startap loyihalarni amalga oshirish;
➖ ta’lim va boshqaruv jarayonlarini raqamli transformatsiya qilish masalalari bo‘yicha kelishuvlarga erishdilar.
Tashrifning asosiy maqsadi — Obuda universiteti tajribasi asosida Jizzax politexnika institutini Yevropa standartlariga mos ravishda transformatsiya qilishdir. Shu munosabat bilan 2026/2027-o‘quv yilidan boshlab institutda Strategik rivojlanish va raqamli transformatsiya bo‘yicha prorektor lavozimini joriy etish hamda xorijiy mutaxassisni jalb etish masalalari muhokama qilindi.