Vazir va arxitektura yoʻnalishida kadrlar tayyorlovchi oliygohlar rahbarlari ishtirokida yigʻilish boʻlib oʻtdi
2026-01-24 17:00:00 / Vazirlik yangiliklari
24-yanvar kuni oliy taʼlim, fan va innovatsiyalar vaziri Qoʻngʻirotboy Sharipov raisligida arxitektura yoʻnalishida kadrlar tayyorlaydigan oliy taʼlim muassasasi rektorlari ishtirok etgan yigʻilishda mamlakat hududlarini ijtimoiy-iqtisodiy rivojlantirishda arxitektura va shaharsozlik taʼlimining oʻrni, oliy taʼlim muassasalari ilmiy salohiyatini hududiy masalalar yechimiga yoʻnaltirish hamda talabalarni amaliy jarayonlarga keng jalb etish masalalari muhokama qilindi.
Prezident videoselektor yigʻilishida belgilangan vazifalardan kelib chiqqan holda, hududlarni kompleks rivojlantirish, mahallalar qiyofasini yangilash va infratuzilmani takomillashtirishda zamonaviy master rejalarning ahamiyati alohida taʼkidlandi.
Yigʻilishda respublika boʻyicha 903 ta “ogʻir” toifadagi mahalla bilan ishlash tizimini joriy etish, bu jarayonga 18 ta oliygohda tahsil olayotgan arxitektura yoʻnalishidagi 7 mingga yaqin talabalarni jalb etish rejalashtirilayotgani maʼlum qilindi. Talabalar mahallalarning bosh rejalarini ishlab chiqish jarayoniga, jumladan, xorijiy mutaxassislar bilan hamkorlikda jalb etiladi.
Shuningdek, Prezident yigʻilishida bildirilgan tashabbuslar doirasida mahalla bosh rejalarini ishlab chiqish boʻyicha talabalar oʻrtasida tanlov eʼlon qilinishi, eng yaxshi loyihalarni taklif etgan jamoalar 100 million soʻmgacha mukofotlanishi belgilandi. Bu orqali zamonaviy yosh arxitektor va urbanistlar korpusini shakllantirish maqsad qilingan.
Yigʻilishda mahallalarni oʻrganish jarayonida geodezik va kadastr maʼlumotlaridan foydalanish, dron va sputnik tasvirlarini jalb etish, sotsio-iqtisodiy tahlillar oʻtkazish, infratuzilma va ijtimoiy xizmatlar holatini baholash, GIS platformalar, 3D modellar va “digital twin” yechimlarini joriy etish kabi vazifalar belgilab olindi.
Mazkur jarayonda professor-oʻqituvchilarning ilmiy rahbarligi, oliygohlar rahbarlarining tizimli nazorati hamda vazirlik tomonidan muvofiqlashtiruv taʼminlanishi alohida taʼkidlandi.
Yigʻilish yakunida oliygohlar rahbarlariga belgilangan vazifalar doirasida manzilli ishlash boʻyicha tegishli koʻrsatmalar berildi.