Korrupsiyaga qarshi kurashish chora-tadbirlarini kuchaytirishga qaratilgan seminar tashkil etildi
2026-01-23 17:00:00 / Vazirlik yangiliklari
Seminarda 100 dan ortiq davlat, 70 dan ortiq nodavlat hamda xorijiy oliy ta’lim muassasalarining sohaga mas’ul xodimlari qatnashdi.
Seminar ishtirokchilari dastlab seminar-trening dasturi, test sinovlari va suhbat jarayonlarini o‘tkazish tartibi bilan tanishtirildi. Shundan so‘ng tinglovchilarga korrupsiyaga qarshi kurashish hamda manfaatlar to‘qnashuvini tartibga soluvchi O‘zbekiston Respublikasi qonunchiligi, qonunosti hujjatlari va ichki idoraviy hujjatlar talablari yuzasidan batafsil tushunchalar berildi.
Bundan tashqari, “Masofaviy nazorat” avtomatlashtirilgan axborot tizimi orqali kelib tushayotgan risklarni tahlil qilish, aniqlangan holatlar yuzasidan ma’lumotlarni tizimga yuklash tartibi bo‘yicha amaliy mashg‘ulotlar o‘tkazildi.
Seminar davomida oliy ta’lim muassasalaridagi korrupsiyaga qarshi ichki nazorat bo‘linmalari faoliyatida uchrayotgan muammo va kamchiliklar muhokama qilinib, ularni bartaraf etish yuzasidan takliflar bildirildi. Shuningdek, ishtirokchilardan faoliyatga oid test sinovlari qabul qilindi hamda vazirlikning “Situatsion markazi”da amaliy mashg‘ulotlar, individual suhbatlar tashkil etildi.
Mazkur seminar O‘zbekiston Respublikasi Prezidenti Shavkat Mirziyoyevning Oliy Majlis va O‘zbekiston xalqiga yo‘llangan Murojaatnomasida belgilangan korrupsiyaga qarshi kurashish bo‘yicha chora-tadbir va topshiriqlar ijrosini oliy ta’lim tizimida samarali amalga oshirishga qaratilgani bilan ahamiyatli bo‘ldi.
Video formatda ko‘rish - https://t.me/eduuz/42010