O‘zbekiston Respublikasi Oliy taʼlim, fan va innovatsiyalar vazirligi

Mazkur tadbirda 100 dan ortiq davlat, 70 dan ortiq nodavlat hamda xorijiy oliy ta’lim muassasalarining sohaga mas’ul xodimlari ishtirok etmoqda.

Seminar doirasida ishtirokchilarga O‘zbekiston Respublikasi Prezidenti Shavkat Mirziyoyevning Oliy Majlis va O‘zbekiston xalqiga yo‘llangan Murojaatnomasida belgilangan korrupsiyaga qarshi kurashishga oid vazifa va topshiriqlarni amaliyotga tatbiq etish bo‘yicha nazariy hamda amaliy ko‘nikmalar berildi.

Xususan, 2026-yilning korrupsiyaga qarshi kurashish sohasida “favqulodda holat” deb e’lon qilingani munosabati bilan oliy ta’lim tashkilotlarida ushbu illatga qarshi kurashishda preventiv chora-tadbirlarni kuchaytirish, korrupsiyaning oldini olishga qaratilgan tizimli mexanizmlarni joriy etish masalalariga alohida e’tibor qaratildi.
 
Shuningdek, talabalar va professor-o‘qituvchilar o‘rtasida targ‘ibot-tashviqot ishlarini izchil davom ettirish, ularning huquqiy ongi va huquqiy madaniyatini yuksaltirish, jamiyatda halollik, shaffoflik va adolat tamoyillarini mustahkamlash, shu jumladan, shartli ravishda “halollik vaksinasi”ni singdirishga qaratilgan yondashuvlar seminar dasturidan o‘rin oldi.

Bundan tashqari, oliygohlarda byudjet mablag‘laridan samarali va maqsadli foydalanish, davlat xaridlari jarayonlarida manfaatlar to‘qnashuviga yo‘l qo‘ymaslik, shu yo‘nalishlarda vazifalarni amalga oshirishda amaldagi axborot texnologiyalari va raqamli platformalardan foydalanish tartibi bo‘yicha ham nazariy va amaliy mashg‘ulotlar o‘tkazildi.

Seminar davomida, shuningdek, Prezidentning 2025-yil 30-dekabrdagi PF–270-son farmoniga muvofiq, korrupsiyaga qarshi kurashish sohasidagi davlat siyosatini 2030-yilgacha sifat jihatidan yangi bosqichga olib chiqishning ustuvor yo‘nalishlari, ularni amalga oshirishda oliy ta’lim tashkilotlarida faoliyat yuritayotgan korrupsiyaga qarshi ichki nazorat bo‘linmalarining o‘rni, vazifalari va mas’uliyati yuzasidan atroflicha tushuntirishlar berildi.

Seminar doirasida 23-yanvar kuni tizimdagi davlat oliy ta’lim tashkilotlari mutaxassislarining bilim va amaliy ko‘nikmalarini baholash maqsadida sinov o‘tkazilib, ishtirokchilarning kelgusidagi kasbiy malakasini oshirish bo‘yicha tavsiyalar ishlab chiqiladi.